काठमाडौं- कोरोना भाइरस (कोभिड १९) का कारण रोकिएको इंग्लिस प्रिमियर लिग सुरु हुने मिति अझ पछि सर्ने भएको छ। शुक्रबार त्यसबारेमा निर्णय गर्न प्रिमियर लिगका २० क्लबले भिडियोमार्फत बैठक गर्दैछन्। अहिले ३० अप्रिलमा सुरु हुने भनिएको खेल पछि सार्नेमा उनीहरु सहमत हुनुपर्ने देखिन्छ।
बैठकपछि प्रिमियर लिग पुनः सुरु हुने मिति मे महिनाका लागि तोक्ने वा फ्रेन्च लिग वान र स्पेनिस ला लिगा जस्तै अनिश्चित समयका लागि प्रतियोगिता स्थगित गर्ने भन्ने बारेमा कुराकानी हुने देखिएको छ। इटालियन सिरी ए मे महिनाको अन्तिममा सुरु गर्ने भनिए पनि त्यो असम्भव जस्तो देखिइरहेको छ।
प्रिमियर लिग सम्बन्धी गरिने निर्णयले क्लबको स्टेडियम र स्वास्थ्यकर्मी राष्ट्रिय स्वास्थ्य सेवाका लागि सहयोग गर्न सकिने बताइएको छ। त्यसले खेलाडीदेखि कर्मचारीसम्मको तलब कम गरिरहेका क्लबहरुले समर्थकको मन जित्न सक्ने अनुमान गरिएको छ।
यस सम्बन्धमा प्रिमियर लिग, फुटबल लिग, प्रोफेसनल फुटबलर्स एशोसियसन र लिग म्यानेजर्स एशोसियसन नियमित कुराकानीमा रहेको बताइएको छ। त्यसका साथै कोरोना भाइरसको संक्रमण केही कम भएपछि निश्चित बन्द रंगशालामा खेल गराउन सकिन्छ कि भन्ने बारेमा पनि छलफल भइरहेको छ।
इंग्लिस प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्।
हुन पनि ३० वर्षपछि लिग उपाधि जित्न लागेको लिभरपुल जति निराश यो समय अरु क्लब सायदै होला। प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ। अप्रिल ३० सम्मका लागि खेल स्थगित भनिए पनि त्यसपछि पनि सुरु गर्न कठीन छ।
युरोपियन फुटबलको प्रशासकीय निकाय युइएफएले च्याम्पियन्स लिग र युरोपा लिग फुटबल अर्को सूचना जारी नभएसम्मका लागि स्थगित गर्ने निर्णय गरिसकेको छ। युरोपकै अरु लिगहरुको अवस्था पनि नाजुक बनिरहेको छ। कहिले सुरु गर्न सकिन्छ भन्ने यकिन छैन। जहाँ बेल्जियमले भने लिगको यो सिजन अन्त्य भएको घोषणा नै गरिसकेको छ।
युइएफएका अध्यक्ष एलेक्जेन्डर सेफेरिनले कोरोना भाइरस (कोभिड १९) का कारण रोकिएको फुटबल सिजन यत्तिकै सकिन सक्ने बताइसकेका छन्। आउने जुनसम्मका रोकिएका खेल हुन नसके यो सिजन यत्तिकै हराउने उनको भनाइ छ। रोकोनाको संक्रमण कम भएपछि बन्द रंगशालामा खेल हुन सक्नेतर्फ संकेत गर्दै उनले भनेका छन्- ‘यति समयमा नै पुनः सुरु हुन सकेन भने फुटबलको यो सिजन यत्तिकै हराउनेछ।’
.jpg)
खेल गतिविधि बन्द हुँदा क्लबको आयको माध्यम पनि कमजोर भएको छ। फुटबल जगतमा कल्पना गरिएभन्दा खराब स्थिति देखिएका छन्। विश्व फुटबलको प्रशासकीय निकाय फिफाले क्लबहरुलाई समेत सहज हुनेगरी केही नियम ल्याउने तयारी पनि गरिरहेको छ। तर फैलिँदो कोरोना संक्रमणका कारण के गर्ने भन्नेमा अन्योल बढ्दै गएको छ।
खेलाडीको तलब कम हुने निर्णयहरु भइरहेका बेला नै इंग्लिस प्रिमियर लिग, इंग्लिस फुटबल लिग र प्रोफेसनल फुटबलर्स एशोसियसनले ‘केही अप्ठ्यारो निर्णय लिनुपर्ने अवस्था आएको’ भन्दै संयुक्त विज्ञप्ती समेत निकालेका थिए। यसले पनि शुक्रबार प्रिमियर लिगमा हुने बैठकको निर्णयले लिग कता पुग्नेछ भन्ने देखिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
