काठमाडौं- गोसाइकुण्ड गाउँपालिकाले चीनसँगको रसुवागढी नाका खोल्न सरकारले गरेको निर्णयप्रति आपत्ति जनाएको छ। गाउँपालिकाले जिल्ला प्रशासन कार्यालय रसुवालाई पत्र पठाउँदै उक्त नाका खोल्दा विश्वभर महामारीको रुपमा फैलिरहेको कोभिड १९ को संक्रमणको जोखिम बढ्ने भन्दै तत्काल यो निर्णय फिर्ता लिनुपर्ने जनाएको छ।
गत आइतबार बसेको मन्त्रिपरिषदले चीन र भारततर्फका नाका ढुवानी प्रयोजनका लागि खोल्ने निर्णय गरेको थियो। स्वास्थ्य तथा जनसंख्या मन्त्रालय र कृषि तथा पशुपन्छी विकास मन्त्रालयको मापदण्ड पूरा गरी लामो समयदेखि नाकामा रोखिएका मालबाहक वस्तुलाई क्वारेन्टाइन चेकजाँचपछि नेपाल भित्रन दिने निर्णय मन्त्रिपरिषदले गरेको थियो। तर गाउँपालिकाले त्यहाँका नागरिकलाई आतंकित पार्नेगरी र शान्तिपूर्ण रुपमा बाँच्न पाउने अधिकारलाई हनन गर्नेगरी केन्द्र सरकारले यस्तो निर्णय गरेको जनाएको छ।
‘रसुवागढी अन्तर्राष्ट्रिय नाका संचालन गरी जनताको शान्तिसँग बाँच्न पाउने अधिकारको हनन भई आम जनतालाई मानसिक तनाव तथा आतंकित पार्ने काम भएको छ,’ जिल्ला प्रशासन कार्यालय रसुवालाइ पठाएको पत्रमा भनिएको छ। ‘नाका खोल्ने निर्णयबाट राज्यले कोरोना संक्रमणको रोकथाम गर्नेतिर भन्दा संक्रमण फैलाउनेतिर अग्रसर भएको महशुस भएको छ। सरकारको यो निर्णय यो निर्णयप्रति आपत्ति जनाउँदै उक्त निर्णय फिर्ता लिनसमेत अनुरोध गर्दछौं,’ पत्रमा उल्लेख छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।