काठमाडौं- विश्वमा महामारीका रुपमा फैलिएको कोभिड-१९ (कोरोना भाइरस) संक्रमणसँग लड्न गैह्रआवासीय नेपाली संघ (एनआरएनए)ले अध्यक्ष कुमार पन्तको संयोजकत्वमा संसारभरीका विज्ञहरुको उच्चस्तरीय समिति गठन गरेको छ।
आपतकालीन अवस्थामा विश्वभर छरिएर रहेका नेपालीहरुलाई सहयोग गर्नका लागि एक रणनीतिक कार्ययोजना समेत तयार गरिसकेको एनआरएनएका अध्यक्ष कुमार पन्तले जानकारी दिए।
सोहीअनुरुप संघका विश्वभर छरिएका राष्ट्रिय समन्वय परिषदहरुले नेपाली कुटनीतिक नियोगहरुको सहकार्यमा नेपाली समुदायलाई सहयोग गर्दै आएको अध्यक्ष पन्तले बताए।
अध्यक्ष पन्तले भने, ‘कोभिड-१९ महामारीका विरुद्ध लड्न नेपाल सरकारसँग गैरआवासीय नेपाली संघले सहकार्य गर्दै आएको छ। यसको लागि संघले नेपाल सरकारलाई कम्तिमा १ करोड रूपैयाँ सहयोग गर्ने प्रतिबद्धता गरिसकेको छ।’
विभिन्न मुलुकहरुवाट स्वास्थ्य परीक्षण उपकरण र स्वास्थकर्मीहरुका लागि सुरक्षाका सामाग्री खरिद गरी नेपालमा उपलब्ध गराउने प्रकृया सुरु भइसकेको संघले जनाएको छ।
यसै प्रसङ्गमा नेपाल सरकारले चीनबाट स्वास्थ्य परीक्षण उपकरण र सुरक्षा सामग्रीहरुको खरिद गर्दाको प्रकृया र खरिद मूल्यका बारेमा संघका अन्तर्राष्ट्रिय समन्वय परिषदका एक सदस्यले टेलिभिजन कार्यक्रममा दिएको सार्वजनिक अभिव्यक्तिप्रति ध्यानाकर्षण भएको संघले प्रष्ट पारेको छ। निजले दिएको अभिव्यक्ति संघको आधिकारिक धारणा नभएको संघले जनाएको छ।
‘खरिद प्रकृयाका विषयमा कुनै कमिजोरी भए यसको छानबिन गर्ने जिम्मेवारी राज्यको सम्बन्धित निकायको हो। यो आपतकालीन अवस्थामा देश विदेशमा बस्ने सबै नेपालीहरुलाई यस महाप्रकोपविरुद्ध सम्पुर्ण मानवजातिसँग एकजुट भएर लड्न अनुरोध गर्दछौं,’ अध्यक्ष पन्तले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
