काठमाडौं- सरकारले कोरोना भाइरसको संक्रमण न्यूनीकरणका लागि चैत ११ बिहान ६ बजेदेखि लकडाउनको घोषणा गरेको थियो। यो अवधिमा अत्यावश्यक बाहेकका सवारीसाधन सञ्चालन तथा मानिसको आवागमनमा समेत रोक लगाइएको छ।
चैत ११ देखि १९ गतेसम्ममा महानगरीय ट्राफिक प्रहरी महाशाखाले उपत्यकाका विभिन्न स्थानबाट २ हजार ७ सय ६ सवारीसाधन नियन्त्रणमा लिएको हो।
महाशाखाका अनुसार लकडाउनको पहिलो दिन सवारीसाधन नियन्त्रणमा नलिई सम्झाइबुझाई गरिएको र माइकिङबाट लकडाउनको समयमा अत्यावश्यक बाहेकका सवारीसाधन नचलाउन भनेको थियो।
त्यसपछि भने महाशाखाले लकडाउन उल्लंघन गरी गुडाइएका सवारी नियन्त्रणमा लिएर साँझमात्र छाड्दै आएको छ। चैत १२ गते १ हजार ६३ वटा सवारीसाधन नियन्त्रण लिएकोमा ९ सय २९ वटा दुइपांग्रे र १ सय ३४ वटा चारपांग्रे थिए।
त्यस्तै चैत १३ मा २ सय ५३ वटा सवारीसाधन ट्राफिक प्रहरीले नियन्त्रणमा लिएकोमा २२५ वटा दुइपांग्रे र २८ वटा चारपांग्रे सवारी थिए।
चैत १४ गते लकडाउन उल्लंघन गर्ने २१६ सवारीसाधनमध्ये १८६ मोटरसाइकल/स्कुटर र ३० कार थिए। चैत १५ गते १३० वटा दुइपांग्रे र ९ वटा चारपांग्रे सवारीसाधन गरि १३९ वटा नियन्त्रणमा लिइएको ट्राफिक प्रहरीको भनाइ छ।
चैत १६ गते लकडाउन उल्लंघन गर्ने सवारीसाधनको संख्या बढेको देखिन्छ। सो दिन २३४ वटा दुइपांग्रे र ९ वटा चारपांग्रे गरी २४३ सवारीसाधन नियन्त्रण लिइएको थियो।
त्यसैगरी चैत १७ मा लकडाउन उल्लंघन गरी गुडाएका २२६ वटा दुईपांग्रे र १६ वटा चारपांग्रे गरी २४२ सवारीसाधन नियन्त्रण लिएको थियो।
चैत १८ गते लकडाउन उल्लंघन गर्ने सवारीसाधनको संख्या बढेको ट्राफिक प्रहरीले सार्वजनिक गरेको तथ्यांक छ। सोही दिन २७५ वटा दुइपांग्रे र २६ वटा चारपांग्रे गरी ३०१ सवारीसाधन नियन्त्रणमा लिइएको थियो।
चैत १९ गते ट्राफिक प्रहरीले २२७ वटा दुइपांग्रे २२ वटा चारपांग्रे गरी २४९ वटा सवारीसाधन नियन्त्रण लिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
