काठमाडौं- भारतीय अटोमोबाइल उद्योग अनिश्चित 'डार्क टनेल' भित्र प्रवेश गरेको विश्लेषण हुन थालेको छ। कोरोना भाइरसको संक्रमणका कारण भातर २१ दिने लकडाउनमा छ। यो अवधिमा अत्यावश्यक वस्तु बाहेकको बिक्री शून्य प्रायः छ। यसको प्रत्यक्ष मार अटोमोबाइल क्षेत्रमा समेत परेकाले उक्त विश्लेषण हुन थालेको हो।
मार्चमा भारतको सवारी बिक्री ४ वर्षयताकै न्यून हुने देखिएको छ। यो सवारी उत्पादकका लागि निक्कै खराव अवस्था हो। मार्चको प्रारम्भिक तथ्यांकअनुसार अर्थिक वर्षको अन्तिम महिनाको बिक्री सेगमेन्ट अनुसार ४० देखि ८० प्रतिशतसम्म घट्ने अनुमान गरिएको छ। यसको प्रमुख कारण कोरोना भाइरस (कोभिड १९) नै भएको द इकोनोमिक्स टाइम्सले लेखेको छ।
मार्चको सवारी बिक्री २०१७ मा जिएसटी लगाउँदा वा २००८ को मन्दीका बेला भन्दा कम हुने आँकलन विज्ञहरूले गरेका छन्। प्यासेन्जर कारको बिक्री १ लाख ४५ हजारदेखि ५० हजार वटा हुने देखिन्छ। यो अघिल्लो वर्षको तुलनामा करिब आधा हुनेछ। त्यस्तै दुई पाङ्ग्रेको बिक्री १० लाखभन्दा कम हुनेछ यो ४५ प्रतिशतको गिरावट हो।
ट्रकको बिक्रीमा ७० प्रतिशतसम्मको गिरावटको अनुमान गरिएको छ। यसरी सबै सेगमेन्टका सवारीको बिक्रीमा आउने गिरावटले आर्थिक वर्ष २०१९/२० को वार्षिक सवारी बिक्री घटेर २०१६ को सरह वा त्यो भन्दा तल जाने देखिन्छ। उपभोक्ताको कमजोर मानसिकता, बिएस-६ मा अप्रिल १ देखि अनिवार्य गरिएकाले स्टक कम हुनु र लकडाउनका कारण बिक्री निरासाजनक देखिएको हो।
बिक्रीमा लकडाउनको असर
विश्वभर महामारीको रूपमा फैलिएको कोरोना भाइरसका कारण मार्च तेस्रो साता सोरूममा जानेको संख्या ५० प्रतिशतले घटेको हो। 'अबको समय अन्धकार छ। अर्को महिनाका लागि कस्तो योजना बनाउने कुनै दृश्य नै छैन। अप्रिल महिना पनि सकारात्मक हुने देखिँदैन। यही हो संकट। योजना दैनिकका लागि मात्र उपयुक्त हुन्छ,' पाँच ठूला कार निर्माता मध्यका एकका सिनियर म्यानेजरले भनेको इकोनोमिक्स टाइम्सले लेखेको छ।
विगतका वर्षहरुमा रिकभरीको सम्भावनाहरू धेरै हुन्थ्यो तर लकडाउनका कारण प्लान्टहरू सबै बन्द रहेकाले केही भन्न नसकिने भोल्भो आइसर कमर्सियल भेइकलका सिइओ विनाेद अग्रवालको भनाइ छ।
बिएस-४ बाट बिएस-६ मा जानु परेकाले पनि भारतीय सवारी उत्पादकहरू मारमा छन्। अप्रिल १४ सम्म लकडाउन भएकाले यो महिनाको तथ्याङ्क झनै निरासाजनक अउने छ। किन भने हाल सबै सवारी उत्पादकमा प्लान्ट कोरोना भाइरसका कारण बन्द अवस्थामा छन्। भारतमात्र होइन हाल विश्वका सबैजसो सवारी उत्पादक कम्पनीले प्लान्ट बन्द गरेका छन्।
नेपालको कुरा गर्ने हो भने करिब ८० प्रतिशत सवारी भारतबाट नै आयात हुने गरेको छ। अडर गरिएका र एलसी खोलिएका सवारी आयात हुनेछन् भने त्यसपछि अवस्था सामान्य नहुन्जेल सवारी आउने छैनन्।
सवारी बिक्री चैतमा ठप्पै हुने बिक्रेताहरूको भनाइ छ। '११ चैतदेखि त लकडाउन नै भयो,' एक बिक्रेताले भने, 'चैत सुरूदेखि नै सवारी बिक्री खासै नभएकाले अवस्था निक्कै निरासाजनक छ।' त्यसपछिका केही महिनाहरू पनि नेपाली अटोबजारका लागि राम्रो हुने नदेखेको ती बिक्रेताको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
