बुटवल–नेपाल–भारत सीमा नाका सुनौलीमा अलपत्र परेका नेपालीलाई भारतमै क्वारेन्टाईनमा राखेर व्यवस्थापन गर्न लागिएको छ। दुई दिनदेखि सीमा क्षेत्र सुनौली दशगजामा बस्दै आएका ३ सय नेपालीलाई नौतनवास्थित क्वारेन्टाईनमा राख्न लागिएको हो।
मंगलबार नेपाल र भारत दुई देशका सुरक्षा अधिकारीबीचको सम्वादले दुवै देशमा अलपत्र परेका नागरिकलाई आ–आफ्नै देशमा व्यवस्थापन गर्ने सहमति भएको रुपन्देहीका प्रमुख जिल्ला अधिकारी महादेव पन्थले जानकारी दिए।
नेपालबाट भारततर्फ जानका लागि बेलहिया पुगेका १ सय २५ भारतीय मजदुरलाई भने नेपाल पक्षले क्वारेन्टाईनमा राख्ने गरी सहमति गरिएको प्रजिअ पन्थले जानकारी दिए। दुवै देशका नागरिक दशगजा क्षेत्रमा अलपत्र परेपछि स्थानीय स्तरबाट दुवै देशका सरकारप्रति आलोचना बढेको थियो ।
सीमामा अलपत्र परेका नेपालीलाई भारतको नौतनवातर्फ लगिएको छ भने भारतीय मजदुरलाई रुपन्देहीको भैरहवास्थित प्रतिमान निमा स्मृति प्रतिष्ठानमा निर्माण गरिएको क्वारेन्टाईनमा राखिएको जिल्ला प्रहरी कार्यालयका प्रवक्ता डिएसपी खड्कबहादुर खत्रीले जानकारी दिए।
उनीहरुको स्वास्थ्य परीक्षण गरी क्वारेन्टाईनमा राख्न लागिएको प्रवक्ता खत्रीले बताए।
सीमा क्षेत्रमा अलपत्र परेका नेपालीलाई समुह बनाएर नेपाल ल्याउन प्रदेश ५ सरकारले निर्णय गरे पनि कार्यान्वयन हुन सकेको छैन।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।