काठमाडौं- देश लकडाउनको अवस्थामा रहेका बेला आफ्ना सेयर सदस्यहरुको जीवन निर्वाहका लागि आवश्यक पर्ने रकम उपलब्ध गराउन काठमाडौं महानगरको सहकारी विभागले मंगलबार सबै सहकारीहरुलाई पत्राचार गरेको छ।
‘संक्रामक समस्याको चुनौतीको सामना गर्नुपरेको वर्तमान सन्दर्भमा सहकारीका तर्फबाट सरकार र आफ्ना सदस्य दुवै पक्षलाई सहयोग होस् भनेर हामीले सहकारीहरुलाई यस्तो परिपत्र गरेका हौं,’ सहकारी विभागका प्रमुख देवेन्द्रप्रसाद पोखरेलले भने‚ ‘भाइरसको संक्रमणबाट बच्न सरकारले विभिन्न मितिमा गरेका निर्णय, राष्ट्र बैङ्कले गरेका परिपत्र संक्रामक रोग आवश्यक सेवा सञ्चालन ऐन २०१४, संक्रमण रोकथामका लागि महानगरले गरेका व्यवस्थाका आधारमा सहकारीहरुलाई अनुरोध गरेका हौं।’
‘सहकारीमा न्यून तथा मध्यम आय भएका व्यक्तिहरुले थोरै थोरै गर्दै, गाँस कटाएर भए पनि केही बचत गरेका हुन्छन्। उनीहरुको यो बचत भोली आउने अप्ठ्यारोका लागि हो।’ विभागका उपनिर्देशक सुमन अधिकारी भन्छन्‚ ‘अहिले सहरी गरीब तथा न्यून र मध्यम आय भएका परिवारलाई जीवन निर्वाह गर्न अप्ठ्यारो परिरहेको छ। उनीहरुलाई खोजेर भए पनि जीवन निर्वाहका लागि सहयोग गर्नुहोस् भनेका हौं।’
उत्पादन र उपभोक्ता सहकारीहरुले उत्पादित वस्तुको सहज वितरणको व्यवस्था मिलाउन आग्रह गर्दै पत्रमा आफ्ना सदस्यहरुलाई सम्भव भए मास्क र स्यानिटाइजर उपलब्ध गराउन आग्रह गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
