काठमाडौं- नेपाल आयल निगमले लकडाउन समयमा खाना पकाउने ग्यास बिक्री वितरणलाई थप सहज र प्रभावकारी बनाउन प्राथमिकताका क्षेत्र निर्धारण गरेको छ। चक्रपथ क्षेत्रभित्र घुम्ती सेवामार्फत ग्यास उपलब्ध गराउने गरी प्राथमिकताका क्षेत्र तोकिएको निगमले जनाएको छ।
निगमले मंगलबारबाट एक दर्जन क्षेत्रलाई ग्यास वितरणको पहिलो प्राथमिकतामा राखी घुम्ती सेवामार्फत सिलिण्डर उपलब्ध गराइरहेको प्रवक्ता बिनितमणि उपाध्यायले जानकारी दिए। निगमले घुम्ती सेवामार्फत पहिलो चरणमा अस्पताल, दीर्घरोगी, बिरामी/असहाय, अनाथालय, फरक क्षमता भएका (अपांगता भएका) र काज किरिया बसेका व्यक्तिलाई ग्यास उपलब्ध गराउनेछ।
यस्तै, बाल आश्रम/बालगृह, पुनरुत्थान केन्द्र/सुधार गृह, कारागार र निःशुल्क भोज गराउने निकाय/संस्था वा व्यक्तिले पनि पहिलो प्राथमिकतामा ग्यास पाउने छन्।
सरकारले तोकेको क्वारेन्टाइनहरु, अत्यावश्यक काममा खटिएका मजदुर र कर्मचारीलाई पनि ग्यास पाउने प्राथमिकताको क्षेत्रको सूचीमा राखिएको छ। यी क्षेत्रले ग्यास पाउन निगमले तोकेको सम्पर्क नम्बरमार्फत जानकारी गराउनुपर्नेछ।
मागअनुसार बजारमा ग्यास सिलिण्डर उपलब्ध गराउन नसकेपछि आयल निगमले आइतबारबाट आधा सिलिण्डरमात्रै बेच्न ग्यास व्यवसायीलाई निर्देशन दिइसकेको छ। त्यस्तै एउटा कम्पनीको ग्यास अर्को कम्पनीले सजिलै साट्न सकिने व्यवस्था मिलाउन निगमले व्यवसायीहरुलाई निर्देशन दिइसकेको छ।
आधा भरिएका ग्यास वितरण गर्न थालेपछि सोमबार एकैदिनमात्र उपत्यका र आसपासका क्षेत्रमा ७६ हजार ८ सय ७१ वटा सिलिण्डर बिक्री वितरण भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
