काठमाडौं– कोरोना भाइरसको रोकथामका लागि नेपाललाई सहयोग गर्न अपिल गर्दै चिनियाँ राष्ट्रपति सी चिनफिङलाई पत्र पुगेको छ। पत्र सत्तारुढ नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले पठाएका हुन्।
तीन दिनअघि (२६मार्च)मा पठाएको उक्त पत्रमा प्रचण्डले कोरोना महामारी रोक्न सफल भएकामा चिनियाँ राष्ट्रपति सीलाई बधाई दिएका छन्। ‘चीनले कोरोना संक्रमणलाई सफलतापूर्वक नियन्त्रण गरेको मिडियाबाट थाहा पाएकोमा हामी खुसी छौं,’ प्रचण्डले पत्रमा भनेका छन्, ‘कोरोना भाइरससँगको यो लडाईंमा जित हासिल गरेकामा म नेकपाकाे तर्फबाट बधाई दिन्छु।’
कूटनीतिक संयन्त्र प्रयोग नगरी पठाइएको पत्रमा प्रचण्डले नेपाल यो महामारीको सामाना गरिरहेको भए पनि यससँग जुध्न तयार भइनसकेको भन्दै विशेष गरी मेडिकल सामग्री सहयोग गर्न आग्रह गरेका छन्। ‘अर्कोतर्फ नेपाल अहिले यो महामारीको सामना गरिरहेको छ,’ प्रचण्डले लेखेको पत्रमा उल्लेख छ, ‘नेपालले योसँग लड्न तयार भइनसकेकाले कोरोनाविरुद्ध लड्न मेडिकल सामग्री र उपकरणको नेपाललाई तुरुन्त आवश्यकता छ। सम्भव भएसम्म सहयोग उपलब्ध गराउन म नेकपा र नेपाली जनताकोतर्फबाट महामहिमलाई आग्रह गर्दछु।’
कोरोना भाइरस संक्रमणको सुरुवाती केन्द्रविन्दू रहेको चीनले पछिल्लो समय यसको संक्रण र यसबाट हुने मृत्युमा नियन्त्रण पाएको छ। चीनले कोरोना संक्रमित विभिन्न देशलाई आवश्यक सहयोग पनि गर्दै आएको छ। चीनले नेपाललाई पनि मेडिकल सामग्रीसहितको सहयोग गर्ने बचन दिएको छ। त्यसै अनुसार चीनले नेपाललाई सहयोग गरेकाे स्वास्थ्य सामग्री आइतबार नेपाल आइपुगेको छ।
पहिलो चरणमा नेपाललाई काठमाडौंस्थित चिनियाँ दूतावास र सिचुवान प्रान्तबाट सहयोग प्राप्त भएको छ। चिनियाँ दूतावास र सिचुवान प्रदेश सरकारले नेपालालई पहिलो चरणमा उपलब्ध गराएको सहयोगमा एन–९५ मास्क २ हजार, डिस्पोजेबल सर्जिकल मास्क २४ हजार, डिस्पोजेबल मास्क २० हजार, ग्लोब्स ५ सय, इन्फ्रारेड थर्मोमिटर १०० थान, प्रोटेक्टिभ क्लोथ ५ सय ३० र एक थान पोर्टेबल भ्यान्टिलेरलगायत रहेको छ।
त्यस्तै अलिबाला फाण्डेसन र ज्याक्मा फाउन्डेसनले एकलाख एन–९५ मास्क र २० हजार पीसीआर मेसिन दिएको छ। चाइना इन्जिनियरिङ लिमिटेड, सिचुवान ह्वाङ्सी ग्रुप र ह्वाङ्सी सिमेन्टले पनि विभिन्न मेडिकल सामग्री दिएका छन्।
चिनियाँ दूतावासले दोस्रो चरणको सहयोग अप्रिल २ मा आइपुग्ने बताएको छ।
नेपालले गत हप्ता कोरोना संक्रमितको उपचारका लागि आवश्यक पर्ने सामग्रीहरुको सूची चीनलाई बुझाएको थियो। स्वास्थ्य मन्त्रालयले आवश्यक सूची बनाएपछि सरकारले परराष्ट्र मन्त्रालयमार्फत् चीनसँग २ लाख पर्सनल प्रोटेक्टिभ इक्विपमेन्ट (पीपीई), पीसीआर टेस्ट किट एक लाख, भीटीएम एक लाख, एन ९५ मास्क डेढ लाख थान मागेको थियो।
त्यसैगरी ल्याबसहितको एम्बुलेन्स १० थान, मोबाइल एम्बुलेन्स ५ थान समेत नेपालले चीनसँग मागेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
