काठमाडौं- नेपाल सरकारले कोरोना भाइरसको रोकथाम गर्न भन्दै आह्वान गरेको लकडाउनका कारण नेपाल पुनर्बीमा कम्पनीको प्राथमिक सेयरमा आवेदन दिनेको पैसा पनि लकडाउनमा परेको छ। नेपाल पुनर्बीमाले चैत ७ गतेसम्म निष्काशन गरेको प्राथमिक सेयरको बाँडफाँड हुन नसक्दा लगानीकर्ताको चार अर्बभन्दा धेरै रकम ब्लक भएर बसेको छ।
अहिलेको प्रणालीअनुसार प्राथमिक सेयर निष्काशन तथा बिक्री बन्द भएको चार दिनभित्रमा बाँडफाँड गर्न सकिन्छ। कोरोनाको संक्रमण रोकथाम तथा बढ्न नदिन नेपाल सरकारले लकडाउन गरेको हुँदा निष्काशन तथा बिक्री बन्द भएको ७ दिन वितिसक्दा पनि बाँडफाँड हुन नसकेको हो। यो अवधि जतिसमयसम्म लम्बिन्छ त्यति समय सर्वसाधारणको उक्त चार अर्बभन्दा धेरै रकम उनीहरुकै बैंक खातामा लक भएर बस्नेछ।
आस्वा प्रणालीअनुसार प्राथमिक सेयरका लागि दिएको आवेदन रकम बराबरको पैसा उनीहरुकै बैंक खातामा रोक्का हुन्छ। सेयर बाँडफाँडपछि आफ्नो भागमा परेको सेयरको पैसा काटिएर बाँकी रकम फुकुवा हुन्छ।
कम्पनीले चैत ४ गतेदेखि ७ गतेसम्म निष्काशन गरेको प्राथमिक सेयरमा ४ लाख ९ हजार ६०१ जनाले ५ करोड ५७ लाख कित्ताको लागि आवदेन दिएका थिए। कम्पनीले सर्वसाधारणतर्फको एक करोड ६० लाख कित्तामध्ये सर्वसाधारणको लागि एक करोड ५१ लाख कित्ता बिक्रीका लागि राखेको थियो।
उक्त सेयरका लागि माग भन्दा ३.६८ गुणा बढी आवदेन परेको हो। नेपाल पुनर्बीमामा आवेदन दिनेको संख्या अहिलेसम्मकै अधिकतम हो। यस अगाडि अपर तामाकोशी रसुवागढी सान्जेन जलविद्युत् कम्पनीमा सबैभन्दा धेरैको आवेदन परेको थियो।
सबैले ३० कित्ता सेयर पाउने
कम्पनीको प्राथमिक सेयरमा आवदेन दिने जति सबैले ३० कित्ता सेयर पाउने भएका छन्। यसका लागि न्युनतम पनि ३० कित्ताको लागि आवदेन दिएको हुनु पर्छ। नियमअनुसार लगानीकर्ताले १० कित्ता मात्रैको लागि पनि आवदेन दिन पाउने व्यवस्था छ। यसले गर्दा अधिकत ४० कित्ताभन्दा माथिको आवदेन दिनेले अधिकत ४० कित्ता सेयर पाउने छन्।
सम्पूर्ण लगानीकर्ताले ३० कित्ता सेयर प्राप्त गरेपछि बाँकी २८ लाख ३८ हजार कित्ता सेयर दुई लाख ८३ हजार जनाले गोलाप्रथाबाट थप १० कित्ता प्राप्त गर्ने छन्। अर्थात् गोला प्रथा ‘लक्की ड्र’मार्फत् दुई लाख ८३ हजारले जम्मा ४० कित्ता सेयर प्राप्त गर्ने छन्। एक लाख २२ हजार जनाले ३० कित्ता मात्रै प्राप्त गर्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
