काठमाडौं– सरकारले एकसाताका लागि ‘लकडाउन’ सुरु गरेको आज चौथौं दिन हो। लकडाउनसँगै सरकारले देशका विभिन्न भागमा अलपत्र परेका विदेशी नागरिकको उद्धार सुरु गरेको छ।
बुधबार र बिहीबार गरी दुई दिनमा ७ वटा उडान मार्फत विदेशी पर्यटकको उद्धार गरिएको छ भने दुई वटा उडानबाट बिरामीको उद्धार गरिएको छ।
नेपाल नागरिक उड्डयन प्राधिकरणका अनुसार बुधबार एयर डाइनेस्टीका २ वटा हेलिकोप्टर उडानबाट १० जना विदेशी पर्यटक सगरमाथा क्षेत्रबाट उद्धार गरिएको थियो।
यसैगरी बिहीबार पनि एयर डाइनेस्टीको २ वटा उडानबाट २ जना र सिम्रिकको एउटा उडानबाट ४ जना विदेशीलाई सगरमाथा क्षेत्रबाट उद्धार गरिएको वायुसेवा अपरेटर संघका प्रवक्ता योगेन्द्र राज कँडेलले जानकारी दिए।
यसैगरी बिहीबार पोखराबाट मात्रै ५८ जनाको उद्धार भएको छ। पोखराबाट विदेशी नागरिक उद्धारका लागि बुद्ध एयरको एटिआर ७२ प्रयोग गरिएको थियो। बुद्ध एयरलाई पर्यटक उद्धारका लागि परराष्ट्र मन्त्रालय हुँदै गृहको सिफारिसमा नेपाल नागरिक उड्डयन प्राधिकरणले स्पेसल उडान अनुमति दिएको थियो।
पोखराबाट उद्धार गरिएको विदशीमा अधिकांश फ्रान्सेली नागरिक थिए। उनीहरुलाई फान्सेली राजदूतावासले आफ्नै खर्चमा जहाज चार्टर गरेको उद्धार गरेको हो। यसैगरी फ्रान्सेली दूतावासले बिहीबार नै लुक्लाबाट पनि आफ्नो नागरिकलाई उद्धार गरेर काठमाडौं ल्याएको छ।
लुक्लाबाट तारा एयरले १५ जना विदेशीको उद्धार गरेको थियो। त्यसमा पनि अधिकांश फ्रान्सेली नागरिक नै थिए।
यसरी उद्धार गरेको आफ्नो देशका नागरिकलाई फ्रान्सेली दुतावासले जहाज चार्टर गरेर आफ्नै देश लैजाने तयारी गरेको छ। उनीहरुलाई दूतावासले अहिले काठमाडौंका विभिन्न होटलमा राखेको छ।
यसैगरी पर्यटन बोर्डका अनुसार जोमसोममा अपपत्र परको ६० जना विदेशीलाई समेत बस मार्फत उद्धार गरेको जनाएको छ।
यसैगरी सिम्रिक एयरले बिहीबार धादिङ र भोजपुरबाट एक–एक जना नेपाली बिरामी उद्धार गरको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
