काठमाडौं- सामाजिक उत्तरदायित्व अन्तर्गत नेपाल चिकित्सक संघ, हाम्रो पात्रो र मोबाइल नेटवर्क एनसेल को प्राविधिक सहयोगमा घरमै बसी कोरोनाभाइरस (कोभिड-१९) को लक्षणसँग मेल खाने देखिएमा स्वास्थ्य सल्लाह तथा परामर्शका लागि ‘एनसेल कल टु डाक्टर’ सेवा प्रयोग गर्न सकिनेछ।
यो सेवा प्रयोग गर्नका लागि हाम्रो पात्रोमा गएर अथवा लिंक खोली आफ्नो समयानुसार अनलाइन बसेका नेपाल चिकित्सक संघमार्फत जुटेका डाक्टरहरुसँग सजिलो भिडियो कल गर्न सकिनेछ।
डाक्टर अनलाइन हुनुभएको खण्डमा 'डाक्टरलाई कल गर्नुहोस्' बटन थिचेर भिडियो कल मार्फत परामर्शका लागि आफ्ना समस्या तथा शंकालाई डाक्टरसमक्ष प्रत्यक्ष भेटमा जस्तै राख्न सकिनेछ।
यो सेवा हाम्रो पात्रोले नेपाल चिकित्सक संघको अनुरोधमा, केवल कोरोना (कोभिड-१९) को संक्रमणको लक्षणसँग मिल्दो समस्या देखिएका नागरिकको लागि एनसेलको प्राविधिक सहकार्यमा तयार गरेको हो।
यस विषम परिस्थितिमा अन्य स्वास्थ्य समस्यासँग सम्बन्धित फोन नगर्न हाम्रो पात्रोले आग्रह गरेको छ। उसले स्वास्थ्य संकटका एकमात्र सहारा डाक्टरहरुको अमूल्य समय र सम्भावित संक्रमितहरुलाई उचित स्वास्थ्य परामर्शका लागि प्राथमिकता दिइनेछ भन्ने आशा लिएको छ।
‘अप्ठेरोमा रहेकाहरुले तुरुन्त उचित स्वास्थ्य परामर्श सहित सेवा लिन सकुन् भन्ने उद्देश्य हो’, हाम्रो पात्रोका व्यवस्थापकीय निर्देशक सन्तोष कुमार देवकोटाले बताए।
‘देश अहिले लकडाउन (बन्दाबन्दी) को स्थितिमा छ र अहिलेको स्वास्थ्य संकटसँग लड्ने यो नै एउटा उत्तम उपाय हो। तपाईं घरमा बस्नु नै आफू र अन्यलाई संक्रमणको सम्भावनाबाट जोगिनु हो। यदी तपाईंलाई कोरोना भाइरसको लक्षणसँग मिल्दो समस्या देखिएको छ भने इन्टरनेटको प्रयोग गरी हाम्रो पात्रोमा उपलब्ध ‘एनसेल कल टु डाक्टर’ सुविधा प्रयोग गर्नुहोस्। र यसबाट जोगिन र अरुलाई पनि जोगाउन उचित स्वास्थ्य सल्लाह प्राप्त गर्नुहोस्’, हाम्रो पात्रोका संस्थापक अध्यक्ष शंकरराज उप्रेती बताउँछन्।
देवकोटाले देशभरको चिकित्सक सञ्जाललाई केवल एक फोनका भरमा आफूहरुको अभियानलाई हातेमालो गर्न साथ दिएको भन्दै वरिष्ठ चिकित्सक तथा नेपाल चिकित्सक संघका अध्यक्ष डा लोचन कार्की र महासचिव डा बद्री रिजालप्रति आभार व्यक्त गरे। उनले हाम्रो पात्रोका प्रयोगकर्ता र एनसेललाई पनि धन्यवाद दिए।
उनले स्वयं सेवकको रुपमा जुट्न तयार डाक्टरहरुलाई [email protected], [email protected], [email protected] मा इमेल गर्न आग्रह गरेका छन्।
यो सेवामा आवद्ध हुने र प्रयोगकर्ताको जिज्ञासालाई कसरी सम्बोधन गर्ने भन्ने विषयमा पछि थप जानकारी दिने बताइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।