काठमाडौं- क्रिकेटर सन्दीप लामिछानेले सरकारले कोरोनाविरुद्ध लड्न स्थापना गरेको ‘कोरोना भाइरस रोकथाम, नियन्त्रण र उपचार कोष’ मा एक लाख रुपैयाँ दिने घोषणा गरेका छन्।
विश्वभर कोरोना भाइरस (कोभिड १९) को संक्रमण फैलँदै जाँदा नेपालमा विभिन्न सुरक्षाका उपाय अपनाउनेसँगै भैपरिआउने कामका लागि सरकारले कोष खडा गरेको छ। जसमा विभिन्न संघ, संस्था र उद्योगीलगायतले रकम जम्मा गरिरहेका छन्। त्यसमा विश्व फ्रेन्चाइज क्रिकेटमा नाम बनाएका युवा क्रिकेटर सन्दीपले पनि एक लाख रुपैयाँ दिने बताएका हुन्।
उनले बिहीबार बेलुका ट्वीटमार्फत भनेका छन्- ‘सरकारले कोरोना भाइरसको जोखिम न्युनिकरणका लागि बनाएको कोषमा म एक लाख रुपैयाँ सहयोग गर्न पाउँदा आभार छु। शारीरिक दुरी बनाउनुपर्ने यो समयमा हामीले सहयोग र साथ चाहिनेहरुलाई पनि बिर्सन हुँदैन। दया र जिम्मेवारीका साथ मानवता अझ फैलनेछ। सुरक्षित रहौँ।’
नेपाल सरकारले कोरोना भाइरस थप नफैलियोस् भनेर मंगलबारदेखि लकडाउन गरेको छ। यसले पुर्याउने सम्भावित जोखिमलाई न्यूनिकरण गर्न सरकारले आर्थिक सहायताको कोष बनाएको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।