काठमाडौं- कोरोना संक्रमणबाट जोगिन नेपाल र भारत दुवै देशले सीमा नाका बन्द गर्ने निर्णय गरेपनि पेट्रोलियम पदार्थको ढुवानीमा भने त्यसले कुनै समस्या नपारेको नेपाल आयल निगमले जनाएको छ।
निगमका कार्यकारी निर्देशक सुरेन्द्र पौडेलले पेट्रोलियम पदार्थ र खाना पकाउने ग्यासको आयात स्वभाविक रुपमा भईरहेको जानकारी दिए। चैत ११ गतेबाट सरकारले लकडाउन घोषणा गरेपछि पेट्रोल, डिजेल, मट्टितेल र हवाई इन्धनको खपत घटेपनि खाना पकाउने ग्यासको बजार माग भने अझै बाँकी छ।
उपभोक्ताले ग्यास सहज रूपमा पाउन नसकेको गुनासो गर्न थालेपछि निगमले बिहीबारबाट आधा भरिएका सिलिन्डर मात्रै बिक्री वितरण गर्ने निर्णय गरेको छ। तर कार्यकारी निर्देशक पौडेल भने ग्यासको आयात कम भएका कारण नभई वितरण प्रणालीलाई मात्र सहज बनाउन निगमले त्यस्तो निर्णय गरेको बताउँछन्। अहिले दैनिक १ लाख सिलिन्डर बराबरको माग रहेकोमा आधा सिलिन्डर मात्र बजारमा पठाउँदा डेढ लाखसम्म बजारमा पठाउन सकिने र त्यसले अहिलेको माग कम हुने उनले बताए।
हाल १५ लाख परिवारले खाना पकाउन ग्यास प्रयोग गरिरहेका छन् भने १ करोड २० लाखभन्दा बढी ग्यास सिलिन्डर बजारमा छन्।
पौडेलका अनुसार तीन दिनमा साढे ४ लाख सिलिन्डर बराबर आयात भएको छ। यसलाई आधा गरेर मात्र बिक्री वितरण गरेर बजारमा पठाइने उनको भनाइ छ। आयात स्वभाविक रुपमा भइरहेको भएपनि ढुवानी गर्दा भने केहि समस्या रहेको उनले बताए।
‘बाटोमा टायर पन्चर हुँदा मात्र पनि समस्या आइलाग्छ, किनकि टाल्ने ठाउँ छैन। चालकहरुले खाना खान पाएका छैनन्। हिजो निगमले आफै अमलेखगंजमा चालकहरुलाई खाना पकाएर खुवायो। बाटो सुनसान छ, लुटपाटको पनि चुनौती छ। गाडी बिग्रियो भने त्यो त्यहीँ थन्किन्छ,’ यस्ता स्वभाविक समस्या त छन नै,’ उनले भने। निगमका अनुसार बिहीबार विराटनगर भन्सारबाट ३ सय ६ मेट्रिन टन बराबरका १७ वटा ग्यास बुलेट भारतबाट नेपाल भित्रिएका छन्। त्यस्तै गौरीफन्टाबाट २ बुलेट ग्यास आयात भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।