काठमाडौं- पूर्वप्रधानमन्त्री बाबुराम भट्टराईले लकडाउनमा कोरोना भाइरस सँगसँगै भोक भाइरसको पनि बन्दोबस्ती गर्नुपर्ने बताएका छन्।
बिहीबार एक ट्वीट गर्दै उनले ज्यालादारीमा गुजारा गर्ने र अशक्तका लागि आर्थिक प्याकेज ल्याउनका लागि समेत सरकारलाई सुझाव दिएका छन्।
ट्वीटमा उनले भनेका छन्‚ ‘देशको लकडाउन ७ दिनभन्दा बढी लम्बिन सक्छ! अत: कोरोना भाइरस सँगसँगै भोक भाइरसको बन्दोबस्ती गर्न ढिला नगरौं। ज्यालादारीमा गुजारा गर्ने र अशक्तहरूको निम्ति तुरून्त आर्थिक प्याकेज हुनुपर्यो! संघको वित्तीय दायित्व, प्रदेशको अनुगमन, स्थानीयको कार्यान्वयन र डिजिटल प्रविधिको प्रयोगको मोडेल हुनसक्छ!’
यसैगरी नेपाली कांग्रेसका सभापति शेरबहादुर देउवाले पनि लक डाउनलाई उत्तम विकल्प भएको बताएका छन्।
उनले पनि दैनिक ज्यालादारीमा निर्भर रहेका र न्यून आय भएकालाई तत्काल विशेष राहत प्याकेज घोषणा गर्न सरकारलाई अनुरोध गरेका छन्।
कोरोनाबाट सुरक्षित हुँदाहुँदै कुनै समूह भोकमारीको शिकार बन्न नपरोस् भन्दै उनले ट्वीटमा भनेका छन्‚ ‘विश्वभरी फैलिएको कोरोना भाइरसबाट सुरक्षित हुन लकडाउन उत्तम विकल्प हो। कोरोनाबाट सुरक्षित हुँदाहुँदै कुनै समूह भोकमारीको शिकार बन्न नपरोस्। म सरकारलाई दैनिक ज्यालादारीमा निर्भर रहेका र न्यून आय भएकालाई तत्काल विशेष राहत प्याकेज घोषणा गर्न अनुरोध गर्दछु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
