तस्बिर सिन्ह्वा
काठमाडौं- कोरोना भाइरस (कोभिड १९)का कारण सम्पूर्ण विश्व ठप्प प्रायः छ। कयौं देशहरु लकडाउन भइसकेका छन्। नेपालसँगै छिमेकी भारतले समेत मंगलबारदेखि २१ दिनसम्म लकडाउनको घोषणा गरेको छ। तर, कोरोना भाइरसको उद्गमस्थल चीन भने तङ्ग्रिदै गएको छ।
चीनमा क्रमिकरुपमा उत्पादन प्लान्टहरु खुल्न थालेका छन् भने उडानहरुसमेत सुचारू हुने क्रममा रहेका छन्। विश्वकाे दोस्रो ठूलो अर्थतन्त्र चीनमा उत्पादन प्लान्टहरु खुल्दा बहुराष्ट्रिय कम्पनीहरुलाई केही राहत हुने द इकोनोमिक्स टाइम्सले लेखेको छ। २०१९ को अन्तिममा चीनमा देखिएको कोरोना भाइरसका कारण हाल युरोप, अमेरिका, भारत तथा ल्याटिन अमेरिकी मुलुक आक्रान्त छन्। चीन भने कोरोना भाइरस नियन्त्रण उन्मुख रहेको छ। नयाँ संक्रमसतहरु ज्यादै न्यून रहेका तथ्याङ्क बाहिर आएका छन्।
योसँगै चीनमा कामदारहरु काममा फर्किन थालेका छन् भने प्रोडक्सन लाइनहरु सुचारू भएका छन्। कोरोना भाइरसको उद्गमस्थल चीनको वुहानमा रहेको लकडाउन छिट्टै खुल्ने अनुमान गरिएको छ। चीनमा गत महिना कार बिक्री ज्यादै न्यून रहेको थियो। कोरोना भाइरस नियन्त्रण उन्मुख रहेकाले मानिसहरु सपिङका लागि बाहिर निस्कन थालेका छन्। योसँगै कारको बिक्री समेट क्रमिकरुपमा बढ्दै जाने अनुमान गरिएको छ। पुरानै अवस्थामा बजार फर्कन भने केही समय लाग्ने विश्लेषकहरुको भनाइ छ।
रियल-टाइम इन्डिकेटरअनुसार चीनले औद्योगिक केन्द्रहरु सुचारू गर्न थालेको देखाएको सानफोर्ड सि बेर्नस्टिनका विश्लेषकले मंगरबार बताएका हुन्।पुनर्सुचारू प्रारम्भिक चरणमा रहेपनि यो क्रमिक रूपमा बढ्दै गएको उनको भनाइ छ।
चीनको हवाइ क्षेत्र कोरोना भाइरसको संक्रमण बढेसँगै निक्कै खुम्चिएको थियो। गतसाता खुम्चिएको हवाइ क्षेत्रको सेडिउल २.४ प्रतिशतले बढेरे सात दिनमा ९.२ मिलियन सिट पुगेको थियो। तर, विश्वका ठूला हवाई बजार भने खुम्चिने क्रममा रहेको छ। यो तथ्याङ्क फ्लाइट डाटा एनलाइसिस गर्ने संस्था ओएजी एभिएसन वर्ल्डवाइडबाट उपलब्ध भएको हो।
त्यस्तै चीनको सववे ट्राफिक गत साता २१ प्रतिशतले बढेको हो भने घरायसी सामानको बिक्री मूल्य तथा परिमाण दुवैमा बढोत्तरी आएको छ। लुनार नयाँ वर्षको बिदामा कोरोना भाइरसको संक्रमण बढेसँगै चीनमा संक्रमित क्षेत्रमा लकडाउन गरिएको थियो। यो जनवरीको अन्त्यतिरबाट सुरू भएको हो।
चीनमा रहेका कार उत्पादकहरुले आफ्ना उत्पादन प्लान्टहरु क्रमिक रूपमा खोल्न थालेका छन्।
यी हुन् उत्पादन सुचारू गर्न थालेका कम्पनी:
होन्डा
जापानी कार उत्पादक होन्डाले चीनमा रहेका आफ्ना दुई प्लान्टमा कार उत्पादन क्रमिकरुपमा बढ्न थालेको जनाएको छ। उत्पादनका लागि आवश्यकपर्ने पार्टपुर्जाको कमी नभएको कम्पनीले जनाएको छ।
निसान
चीन सरकारले तोकेको नीति नियमअनुसार सवारी उत्पादन सुरु गरेको निसानले भनेको छ। सुरुमा केही प्रतिशतबाट सुरु भएको उत्पादन क्रमशः बढाउँदै जाने कम्पनीको भनाइ छ।
एसएआइसी
चीनको ठूला सवारी उत्पादक मध्यको एक एसएआइसीले पनि कार उत्पादन सुचारू भएको जनाएको छ। कम्पनीले उत्पादन क्षमता भने माग अनुसार बढाउँदै जाने बताएको छ। पार्टसको अभाव हुनसक्ने अवस्थाबारे कम्पनी सचेत रहेको र त्यो अवस्था नआउने दावी गरेको छ।
टेस्ला
स्थानीय सरकारको सहयोगका कारण टेस्लाको प्यान्ट धेरै प्रभावित नभएको कम्पनीले जनाएको छ। तुलनात्मक रूपमा अन्य कम्पनीभन्दा टेस्ला कोरोना भाइरसका कारण कम प्रभावित थियो। अमेरिकाभन्दा बाहिर टेस्लाको फ्याक्ट्री एउटामात्र छ त्यो हो चीनमा।
चीनको साँघाइमा रहेको टेस्लाको प्लान्टबाट हाल सातामा ३ हजार कार उत्पादन हुन थालेको कम्पनीले गत शुक्रबार जनाएको थियो।
टोयोटा
अर्को जापानी कार उत्पादक टोयोटाले चीनको ग्वाङझाउ र च्यानचुनमा रहेको प्लान्ट नियमित रुपमा सञ्चालनमा आएको छ। कम्पनीले दुई सिफ्टमै प्लान्ट सुचारू गरेको छ। चीनमै गरेको अर्को प्लान्टबाट भने एक सिफ्टमा मात्र उत्पादन सुरु गरिएको टोयोटाले जनाएको छ।
त्यस्तै चेन्दूमा रहेको प्लान्ट पुरानै झैं एक सिफ्टमा चल्न थालेको छ। टोयोटाको चीनमा रहेका ९८ प्रतिशत डिलरहरू पुनः खुलेका छन्। प्लान्टहरू सुचारू भएको र डिलरहरू खुलेकाले टोयोटाले २०२० का लागि तय गरेको टार्गेट परिमार्जन नगर्ने भएको छ।
फक्सवागन
चीनमा कोरोना भाइरस संक्रमणका कारण बन्द अवस्थामा रहेका सबैजसो उत्पादन साइट सुचारू भएको फक्सवागन एजीले जनाएको छ। तथापि सुस्त सप्लाइचेन, मजदुरलाई सीमित स्थानमा मात्र गर्न दिइएको यात्रा र साझेदार कम्पोनेन्ट उत्पादकका कारण केही समस्या भने बाँकी रहेको फक्सवागनको भनाइ छ।
आवश्यकता र मागका आधारमा थप प्लानिङ गर्दै जाने कम्पनीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
