काठमाडौं- सरकारले कोरोनाको जोखिम न्यूनीकरणका लागि मंगलबार विहान ६ बजेटबाट सम्पूर्ण यातायातका साधन बन्द गराएको छ। विहान ६ बजेबाट सडक तथा हवाइ यातायात बन्द गराइएको हो।
सरकारको यो निर्णय चैत १८ गते अर्थात् अर्को मंगलबारसम्म कार्यान्वयनमा रहनेछ। सोमबार एकजनामा कोरोना भाइरस संक्रमणको पुष्टि भएसँगै सम्पूर्ण उडान तथा यातायात बन्द गर्ने निर्णय गरिएको हो।
यसैगरीरी सरकारले अत्यावश्यकबाहेक घर बाहिर ननिस्किन पनि आदेश जारी गरेको छ। संक्रामक रोग ऐन २०२० को व्यवस्थाअनुसार सरकारले यो व्यवस्था गरेको हो।
अस्पताल, सुरक्षाकर्मी तथा अत्यावश्यकबाहेक कुनै पनि सवारी साधन सञ्चालन हुन नदिने निर्णय सरकारले सोमबार गरेको थियो।
सुरक्षा निकायबाट प्रयोग हुने वायुयान र तोकिएका अन्य उडानबाहेक कुनै पनि आन्तरिक उडान सञ्चालन गर्न नदिने निर्णय पनि सोमबार गरिएको थियो।
सुरक्षा, खाद्यवस्तु, दूध, खानेपानी, सञ्चार, भन्सार, क्वारेन्टाइन जस्ता अत्यावश्यक पर्ने कर्मचारी मात्र हुने व्यवस्था गरी अन्य कर्मचारीलाई आवश्यक परेको बखत तत्काल उपस्थित हुने गरी सम्बन्धित कार्यालय प्रमुखले बिदा दिने निर्णय पनि कोरोना रोकथाम तथा नियन्त्रण उच्चस्तरीय समितिले गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।