काठमाडौं- सरकारले सोमबार देशभर मंगबारदेखि घरबाहिर निस्कनसमेत प्रतिबन्ध गर्ने आदेश गरेको भन्दै कांग्रेस प्रवक्ता विश्वप्रकाश शर्माले स्वागत गरेका छन्। ठूलो जोखिमबाट बच्न सानो कष्टलाई सहजतापूर्वक लिनुपर्ने भन्दै प्रवक्ता शर्माले स्वागत गरेका हुन्।
सोमबार बेलुका ट्विट गर्दै उनले लकडाउनको घोषणा सही भएको बताएका छन्।
प्रवक्ता शर्माले सरकारलाई सात बुँदे आग्रहसमेत गरेका छन्।
यस्तो छ उनको ७ बुँदे आग्रह
१. `लकडाउन´ को अवधी ७ दिनबाट लम्बिनपनि सक्छ,त्यस्तो स्थितिमा `दिनभरि काम गरेर माम जुटाउने बर्ग´ को चुल्हो यो लकडाउनले पुरै `लक´ गर्न सक्छ। अत: सरकारले यथासिघ्र राहतको प्याकेज निर्माण गरेर कार्यान्वयनको प्रक्रिया सुनिस्चित गर्नु दुरदर्शिता हुनेछ।
२. जोखिमसंग जुध्न दैनिक रूपमा सहि सूचना र तथ्यहरु सम्प्रेषण गर्ने कार्यमा सरकारले एक द्वार प्रणाली तत्काल निस्चित गर्नुपर्दछ। जसले नागरिक पंक्तिमा निरन्तर ढाडस संगै उच्च मनोबलको साथ रहनेछ। समुदायले सतर्कता राख्दै साथ दिएर यो संघर्षलाई सफल बनाउनु छ।
३. खाद्यान्न अभाव र असहजता हुनसक्ने स्थिति आउन नदिन संघीय सरकारले तीनै तहको सरकार विच उचित समन्वय साथ सुलभ स्थिति बनाउन र नागरिकलाई निरन्तर आश्वस्त बनाउन जरुरी छ।
४. `सेल्फ क्वारेन्टाइन´ मा बस्ने जो कसैलाई पनि कोरोना सम्बन्धि निस्चित लक्षण देखिए सम्पर्क कहाँ गर्ने,तिनलाई अस्पताल कसरी कहाँ पुर्याइने र उपचार प्रक्रियाको सहजता के हुने ,जस्ता अन्यौल सरकारले यथासिघ्र चिर्न जरुरी छ।
५. यो `तेस्रो विश्वयुद्ध´ संसारले स्वास्थकर्मीहरुको नेतृत्वमा लड्नुपरेको छ ! अत: स्वास्थकर्मीहरुको उच्च मनोबल राख्न,पर्याप्त पिपिइ प्रबन्ध गर्न र प्रयोगशाला कम्तीमा ७ प्रदेशमै प्रबन्ध गरेर परिक्षण सहज बनाउन सरकारले तिब्र कार्य गर्नुपर्दछ।
६.`लकडाउन´ ले सबै थरी ब्यवसायलाई गम्भीर असर पुग्ने स्थिति दृस्टिगत गरेर सरकारले व्यवसायिको बैंकिङ ब्याज घटाउने र किस्ता तिर्ने समयावधि लम्ब्याउन समन्वयको भुमिका यथासिघ्र निर्वाह गर्नुपर्दछ।
७. एकातर्फ हामी पुरै देश `लकडाउन´ मा गएका छौं भने अर्कातर्फ लाखौं नेपाली बिदेशी भुमिमा `लक्ड´ स्थितिमा छन् ! तिनको अभिभावक मुलत मातृभुमी नेपाल नै हो। सरकारले विविध माध्यमबाट प्रवासी नेपालीको सहजताका लागि भूमिका निर्वाह गर्न जरुरी छ।
उनले अन्त्यमा थपेका छन्, 'अन्त्यमा, सरकारलाई यी सबै आग्रह `लकडाउन´ पुर्वनै हामीले आन्तरिक संवाद मार्फत गरिसकेका छौं। यस्तो बेला सरकारलाई सघाउनु हामी सबैको कर्तव्य हो। तर सरकारलाई घच्घच्याउने दायित्वपनि हामी सबैको हो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1784873618.png)
