काठमाडौं- नेपाल विद्युत् प्राधिकरणले ७५ मेगावाट उत्पादन क्षमता बराबरको त्रिशुली गल्छी जलविद्युत् आयोजनाको विद्युत् खरिद–बिक्री सम्झौता (पिपिए) रद्द गरेको छ। सिद्धकाली पावर लिमिटेडकाे प्रर्वद्धनमा बनिरहेको उक्त आयोजना निर्माणका लागि वित्तीय व्यवस्थापन हुन नसकेपछि पिपिए रद्द गरिएको प्राधिकरणले जनाएको छ।
प्राधिकरण र आयोजनाबीच २०७३ बैशाख २० गते पिपिए सम्झौता भएको थियो। विद्युत् प्राधिकरणले सोमबार सार्वजनिक सूचना जारी गर्दै ‘प्राधिकरण र कम्पनीबीच भएको विद्युत् खरिद–बिक्री सम्झौतामा उल्लेखित दफा ३८ उपदफा २ को प्रावधानबमोजिम कम्पनीले तोकिएको समयमा वित्तीय व्यवस्थापन गर्न नसकेका कारण यस्तो निर्णय गरिएको’ जनाएको छ।
दुई पक्षबीच भएको सम्झौताअनुसार पिपिए भएको २१ महिनाभित्र आयोजनामा लगानी जुटेको जानकारी प्राधिकरणलाई दिईसक्नुपर्ने थियो। सिद्धकाली पावर लिमिटेडले तोकिएको समयमा वित्तीय व्यवस्था समापन सम्बन्धी जानकारी प्राधिकरणलाई नदिएपछि सम्झौता स्वतः रद्द भएको हो।
सिद्धकाली पावर लिमिटेडले चीनको डङफ्याङ इलेक्ट्रिक इन्टरनेशल कर्पोरेशनसँग इपिसिएफ (इन्जिनियरिङ प्रोक्र्युमेन्ट कन्स्ट्रक्सन फाइनान्स) मोडलमा बनाउने गरी २०७४ चैत ४ गते सम्झौता गरेको थियो। उक्त सम्झौताअनुसार कूल १४ अर्ब ५० करोड लागत अनुमान गरिएको यो आयोजनामा चिनियाँ कम्पनीले १० अर्ब २९ करोड रुपैयाँ र बाँकी रकम नेपाली प्रबद्र्धकले जुटाउनुपर्ने थियो। चिनियाँ कम्पनीले परियोजनाको कूल लागतको ९० प्रतिशत काम उधारोमा सम्पन्न गर्ने र परियोजना निर्माण भई संचालनमा आएको दुई वर्षभित्र किस्ताबन्दीमा भुक्तानी गर्नुपर्ने सर्तमा रही काम गरिने पनि दुई पक्षबीच सम्झौता भएको थियो।
२०७५ साउनदेखि निर्माण सुरु गरेर साढे ३ वर्षभित्र सम्पन्न गर्ने भनिएको उक्त आयोजनामा लक्ष्मी बैंकसहित ८ बैंक लगानीको प्रतिबद्धता जनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
