काठमाडौं– कोरोना भाइरस (कोभिड-१९) संक्रमण फैलँदै गएकाले ठप्प रहेको विश्व खेलकुदको अवस्था थप नाजुक बन्दै जाँदा ओलम्पिक सार्न अन्तर्राष्ट्रिय ओलम्पिक कमिटी (आइओसी) र जापानमाथि दबाब थपिएको छ।
ओलम्पिक खेलकुद आउँदो जुलाई २४ देखि अगस्ट ९ सम्म जापानमा हुने तय छ। जसमा २ सय ५ भन्दा बढी देशका ११ हजार भन्दा बढी खेलाडी र लाखौँ दर्शक सामेल हुनेछन्। यस्तो अप्ठ्यारो परिस्थितिमा ठूलो खेल उत्सव सञ्चालन गर्न नहुने भन्दै दबाब परेपछि आइओसीले ओलम्पिक सार्ने या नसार्ने भन्ने विषयमा निर्णय गर्न चार हप्ताको समय छुट्याएको छ।
आइओसी कार्यकारी बोर्डको आइतबार बसेको बैठकले अवस्थाको आँकलन गर्दै चार हप्तामा निर्णय गर्न समय सीमा तोकेको हो।
यसअघि भने अन्तर्राष्ट्रिय ओलम्पिक कमिटीले तोकिएकै मितिमा खेल सञ्चालन गर्न सकिने बारे कुराकानी गरिरहेको थियो। तर विभिन्न देशका खेल संघहरुले त्यसको विरोध गरिरहेका थिए। विश्व एथ्लेटिक्सका प्रमुख लर्ड कोएले भने समय पर्याप्त रहेको भन्दै भनेका छन् -‘हतारोमा कुनै पनि निर्णय गर्नु ठीक होइन, हामीसँग अझै समय छ। हरेक कुरा सम्भव छन्, विकल्प समय आएपछि खोज्न सकिन्छ।’
कोरोना भाइरसको संक्रमण फैलँदै गए पनि जापानमा हुने भनिएको ओलम्पिकलाई असर नगर्ने गरी काम गरिएको जापानका ओलम्पिक प्रमुख कार्यकारी तोसिरो मुटोले पनि बताएका थिए।
ओलम्पिकलाई कोरोनाले असर गर्ने विश्व खेलकुदमा चलिरहेको बहसपछि ओलम्पिक प्रमुख कार्यकारी तोसिरोले असर नगर्ने गरी काम गरिएको बताएका हुन्। गएको शनिबार जापानका प्रधानमन्त्री सिन्जो आबेले पनि ओलम्पिक तोकिएकै समयमा सम्पन्न हुने बताएका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।