काठमाडौं - अवतरण भएको करिब ४ घण्टापछि सिल्क एयरबाट काठमाडौं आएका ९८ जना यात्रुलाई विमानबाट बाहिर ल्याइएको छ। कोरोना भाइरस संक्रमणको शंकामा त्रिभुवन अन्तर्राष्ट्रिय विमानस्थल प्रशासनले अवतरण भएको जहाजबाट यात्रु झर्न रोके पनि यात्रुहरूले जहाजभित्रै आन्दोलन गर्न थालेपछि उनीहरूलाई बाहिर ल्याइएको हो।
उनीहरुको स्वास्थ्य परीक्षणपछि क्वारेन्टाइन पठाउने तयारी भएको अन्तर्राष्ट्रिय विमानस्थल स्रोतले जानकारी दिएको छ।
विमानस्थल प्रशासनका अनुसार मध्यराति १२ बजेपछि जहाजका यात्रुको स्वास्थ्य परीक्षण थालिएको छ। स्वास्थ्य परीक्षणपछि उनीहरूको अध्यागमन जाँचपासको प्रक्रिया अघि बढाइने विमानस्थल स्रोतले जानकारी दिएको छ। बेलुकी ८:३५ मा विमानस्थल अवतरण गरेको यो जहाजभित्र रहेका यात्रुहरू कोरोनाको उच्च संक्रमण भएका मुलुकहरूबाट आएको आशंकामा विमानबाट बाहिर ल्याउने अनुमति दिइएको थिएन।
विमानस्थल स्रोतले दिएको जानकारीअनुसार विमानभित्र १ जना अष्ट्रेलियन् र ९७ जना नेपाली नागरिक छन्। उनीहरू विभिन्न देश हुँदै सिल्क एयरबाट काठमाडौं आएका थिए।
विमानभित्र रहेका यात्रुलाई बाहिर ल्याइए पनि काठमाडौंबाट सिंगापुर जान लागेका १६० जना यात्रुको उडान भने शनिबार राति हुनेछैन। काठमाडौं-सिंगापुर उडान रद्द गरिसकिएको विमानस्थल स्रोतले जानकारी दियो। 'सिल्क एयरको रातिको डिपार्चर रद्द गरिसक्यौँ,' स्रोतले नेपाल लाइभलाई जानकारी दियो।
सरकारले यसअघि विभिन्न मुलुकबाट आएका ६१ जनालाई क्वारेन्टाइनमा राखिएको छ। संक्रमित मुलुकबाट आएका उनीहरूलाई खरिपाटीस्थित नेपाल विद्युत प्राधिकरणको भवनमा निर्माण गरिएको क्वारेन्टाइनमा राखिएको छ।
सरकारले यसअघि नै चैत ९ अर्थात आइतबारबाट चैत १८ गतेसम्मका लागि अन्तर्राष्ट्रिय उडान बन्द गर्ने घोषणा गरिसकेको छ। त्यस अवधिसम्म कुनै पनि अन्तर्राष्ट्रिय उडान हुने छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
