काठमाडौ–आफ्नो सुविधा बढाउन भन्दै काठमाडौ आएका प्रदेश प्रमुखहरु नेताहरुको आश्वासनपछि फर्किएका छन्।
२८ फागुनदेखि काठमाडौ आउन थालेका उनीहरुले २ चैतमा नेकपा अध्यक्ष पुष्पकमल दाहाल ‘प्रचण्ड’लाई भेटेका थिए। प्रधानमन्त्री केपी ओलीसँग भेट्न समय नमिलेपछि प्रधानमन्त्रीका प्रमुख राजनीतिक सल्लाहकार विष्णु रिमाललाई भेटे भने पटक–पटक ताकेता गरे पनि राष्ट्रपति विद्यादेवी भण्डारीसँग भेट्ने समय नै पाएनन्। सबैतिरबाट माग सम्बोधन हुने ‘उधारो’ आश्वासन दिइएपछि उनीहरु ६ चैतमा कार्यथलो फर्किएका हुन्।
प्रदेश एकका प्रमुख सोमनाथ अधिकारी, दुईका तिलक परियार,बाग्मतीका विष्णुप्रसाद प्रसाई, गण्डकीका अमिक शेरचन, पाँचका धर्मनाथ यादव,कर्णालीका गोविन्द कलौनी र सुदूरपश्चिम प्रमुख सर्मिला त्रिपाठी एकै पटक काठमाडौंं आएर दबाब दिएका थिए।
गण्डकीका प्रमुख अमिक शेरचनले प्रदेश प्रमुखको सेवा सुविधा तथा अधिकार सम्बन्धमा शीर्ष तहमा जानकारी नै नभएको बताए। ‘मलाई प्रदेश प्रमुखको बारेमा धेरै थाहा थिएन, अहिले धेरै कुरा थाहा पाईयो,’ प्रचण्डको भनाई उद्दृत गर्दै शेरचनले भने, ‘पहिला कांग्रेसलगायत अरु पार्टीका प्रदेश प्रमुख हुनुहुन्थ्यो, हामीलाई केही भन्नु भएन।’
प्रदेश प्रमुखहरुले राखेका माग संवेदनशील भएको भन्दै प्रचण्डले सकेसम्म तत्काल सम्बोधन गर्न प्रयास गर्ने आश्वासन दिएका थिए। प्रदेश प्रमुखहरुले प्रधानमन्त्रीलाई भेट्न समय मागे पनि सार्क राष्ट्रको भिडियो कन्फ्रेन्समासहभागी भएपछि नमिलेको प्रधानमन्त्रीका प्रेस सल्लाहकार सूर्य थापाले बताए।
‘प्रधानमन्त्रीज्यूलाई भेट्ने समय नपाएपछि प्रदेश प्रमुखहरुले प्रधानमन्त्रीका प्रमुख राजनीतिक सल्लाहकार विष्णु रिमालाई भेटुनु भयो,’ थापाले भने, ‘उहाँहरुले आफ्ना गुनासा रिमाललाई राखेर फर्किनु भयो।’ प्रदेश प्रमुखका मागका सम्बन्धमा रिमालले अध्ययन गरेर एउटा निष्कर्षमा पुग्ने बताएका थिए ।
यस्ता थिए प्रदेश प्रमुखका मागहरु
सातै प्रदेशका प्रमुखले आ-आफ्ना प्रदेशका समस्यालाई बँुदागत रुपमा तयार गरेका थिए। एकै पटक सातै प्रदेशका समस्यालाई एकै ठाउँमा राखेर दबाब दिँदा सुनुवाइ हुने देखेपछि उनीहरु काठमाडौं आएका थिए। प्रदेश प्रमुख बस्दै आएको कार्यालय,निवासलगायत आवश्यक भौतिक संरचना अपुग भएको भन्दै भवनलगायत आवश्यक फर्निचरको व्यवस्था गर्न माग राखेका थिए।
यस्तै मर्यादाक्रममा पूर्व राष्ट्रपति, पूर्व उपप्रधानमन्त्री, पूर्व उपराष्ट्रपति, पूर्व प्रधानमन्त्रीभन्दा तल सातौं नम्बरमा राखिएको भन्दै उनीहरुले असन्तुष्टि जनाएका थिए।
आफूहरुलाई मर्यादाक्रममा निक्कै तल पारिएको भन्दै फेरबदल गर्नुपर्ने माग उनीहरुको थियो। प्रदेश प्रमुखहरुले प्रति महिना ६४ हजार रुपैयाँ पाउँछन् भने अतिथि सत्कार तथा भैपरी आउने खर्च प्रति महिना ४० हजार रुपैयाँ पाउँछन्। पोसाक खर्च सुविधा एक वर्षमा १८ हजार रुपैयाँ पाउँने व्यवस्था छ। प्रदेश प्रमुखहरुले गाडी सुविधा र सहयोगीको रुपमा थप कर्मचारीको व्यवस्था गर्न पनि माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768288990.png)
