काठमाडौं- कोरोना भाइरस (कोभिड-१९) को संक्रमण बढ्दै जाँदा विश्व फुटबल नराम्ररी प्रभावित भएका छन्। महत्वपूर्ण लिग फुटबलहरु स्थगित छन्। अन्य गतिविधि ठप्प छन्। जसले गर्दा केही क्लबले खेलाडीको तलब घटाउने घोषणा गरिसकेका छन् भने आउँदो सिजन हुने ट्रान्सफरमा पनि असर पर्ने देखिएको छ।
कोरोना संक्रमणकै कारण युरोकप फुटबल सरेको छ, च्याम्पियन्स लिग, युरोपा लिगसँगै क्लब विश्वकप जस्ता ठूला प्रतियोगिताहरु सरेका छन्। खेल गतिविधि बन्द हुँदा क्लबको आयको माध्यम पनि कमजोर भएको छ। फुटबल जगतमा कल्पना गरिएभन्दा खराब स्थिति देखिएका छन्।
विश्व फुटबलको प्रशासकीय निकाय फिफाले क्लबहरुलाई समेत सहज हुनेगरी केही नियम ल्याउने तयारी पनि गरिरहेको छ।
टिमहरु वेडर बर्मेन, बोरुसिया मोन्चेग्लाबाच, लायोन र हर्टस् जस्ता क्लबले त केही खेलाडीलाई बिदा गर्ने र केही खेलाडीको तलब कम गर्ने गरी काम अगाडि बढाइसकेका छन्। विशेष त क्लबको आम्दानी पूरा बन्द भएको भन्दै ती क्लबले यस्तो कदम चाल्नुपरेको बताएका छन्।
फिफा अध्यक्ष जियानी इन्फान्टिनोले क्लबहरुलाई सहज वातावरण बनाइदिन काम गरिने बताएका छन्।
कोरोना भाइरसको संक्रमणसँग खेलाडी र प्रशिक्षक नै जुध्नु परिरहेका बेला केही निर्मम निर्णय लिन नहुने बताइएको छ। तर क्लबहरु आउँदो सिजनका लागि हुने ट्रान्सफरमा पनि अहिलेको अवस्थाले असर गर्ने बताइरहेका छन्।
यस्तो अवस्थामा कुनै पनि क्लबले नयाँ ट्रान्सफरको ग्यारेन्टी गर्न सक्ने अवस्था छैन। आय के हुने, लगानी कहाँबाट ल्याउने भन्ने हरेक क्लबलाई समस्या छ। यस्तो भयावह अवस्था अझै केही हप्ता बढ्ने हो भने त्यसबाट बाहिर निस्कन क्लबहरुलाई लामो समय लाग्नेछ।
अहिले सिजनका बाँकी खेल सकाउनेमा मात्रै धेरैको ध्यान गइरहे पनि त्यसपछि के हुने भन्नेमा बहस राम्ररी सुरु भएकै छैनन्। ‘अब आउँदो समयमा १०० मिलियन युरोको ट्रान्सफर गर्न कुनै पनि क्लबलाई सजिलो छैन। अब परिस्थिति फेरिएको छ यसको असर अरु कति पर्ने हो यकिन छैन’ स्पोर्टिङ डाइरेक्टरले भनेका छन्।
अहिलेको अवस्थामा हेर्दा एक सय मिलियन युरोभन्दा बढी रकम पर्ने नौं खेलाडीहरु देखिएका छन्। जसमा नेमार, केलियन एमबाप्पे, फिलिप कोउटिन्हो, योआओ फेलिक्स, उसमान डेम्बेले, एन्टोनी ग्रिजम्यान, क्रिष्टियानो रोनाल्डो, पोउल पोग्बा र इडन हाजार्ड रहेका छन्।
त्यसमा विशेष गरी नेमार, कोउटिन्हो, पोग्बा नयाँ सिजनमा क्लब फेर्ने मनस्थितिमा देखिएका थिए। यीबाहेक पनि अरु केही खेलाडीहरुलाई सय मिलियन युरोभन्दा बढी रकमा भित्र्याउन ठूला क्लबहरु छलफलमा थिए।
फिफासँगै युरोपियन फुटबलको प्रशासकीय निकाय युइएफएले पनि फुटबलमा पर्ने असर कम गर्नेबारे छलफल भने गरिरहेका छन्। यस्तै अवस्थामा खेल गतिविधि बन्द गर्ने र नयाँ आउने परिस्थितिको सामना गर्न तयार रहने उनीहरुको छलफल केन्द्रित देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
