काठमाडौं- नेपालमा अहिले १० वटा वायुसेवा कम्पनीले हेलिकोप्टर सेवा प्रदान गर्दै आएका छन्। यी १० कम्पनीसँग अहिले झन्डै ३ दर्जनको हेलिकोप्टर रहेका छन्।
तर, कोरोनाको जोखिम न्यूनीकरण भन्दै सरकारले पर्यटक भिसामा प्रतिबन्ध लगाएसँगै हेलिकोप्टर कम्पनीको उडान ठप्पजस्तै भएको छ। दैनिक सयभन्दा बढी उडान हुने हेलिकोप्टरको संख्या अहिले ९५ प्रतिशतभन्दा बढीले कमी आइसकेको छ।
विमानस्थल कार्यालका अनुसार १० वटा हेलिकोप्टर कम्पनी भएपछि पछिल्लो १३ मार्चदेखि १६ मार्चसम्मको ४ दिनमा ८ कम्पनीले ५० वटामात्रै उडान गरेका छन्।
यसरी भएको उडानबाट हेलिकोप्टर कम्पनीले विमानस्थललगायत चालक दललाई दिने तलब भत्ताको रकमसमेत जोह गर्न सकेका छैनन्।
सोमबारमात्रै कोरोना जोखिम न्यूनीकरण उच्चस्तरीय समितिका संयोजकसँगको छलफलमा वायुसेवा सञ्चालक संघका अध्यक्ष क्याप्टेन रामेश्वर थापाले हेलिकोप्टर उडानमा ४ अर्ब नोक्सानीको अनुमान भएको बताएका थिए। साथै उनले राज्यले ब्याजमा छुटदेखि लोन तिर्नुपर्ने समयमा केही हेर्दिनु पर्ने बताएका थिए।
हेलिकोप्टर उड्ने अवस्था नभएपछि अधिकांश कम्पनीले कर्मचारीलाई बेतलबी बिदा दिने, बीमा कम्पनीलाई ग्राउन्डेड कभरेजका लागि लबिङ गर्ने तथा सरकारसँग ऋणसम्बन्धी नीतिमा सहुलियतको वातावरण बनाउनका लागि लविङमा लागि परेका छन्।
मार्चको सुरूदेखि नै पर्वतीय क्षेत्रमा जाने टिमका लागि आवश्यक सामान आपूर्तिमा हेलिकोप्टर प्रयोग हुँदै आएका थिए। सरकारले कोरोना जोखिम न्यूनीकरणका लागि भन्दै बसन्त ऋतृको हिमाल आरोहणको अनुमतिसमेत नदिने निर्णय गरेपनि हेलिकोप्टरको उक्त काम पनि बन्द भएको छ। मार्च १५ देखि त पर्यटकको हिमाल तथा पहाडको यात्रा सुरू हुन्थ्यो। त्यसको एक हप्तापछि हेलिकप्टर उद्धारमा प्रयोग हुन्थे।
अन्तिमसम्म उद्धारमै रहँदा धेरैको डलर आम्दानी पनि यही स्रोतबाट हुने गरेको संघको भनाइ छ। तर, अहिले यो अब पूर्ण रुपमा बन्द हुने अवस्थमा आएको छ।
कोरोनाकै कारण अपरेटरले बुधबारको दिनसम्म उडानको सेड्युल तयमा भन्दा पनि ऋणको किस्ताको हिसाब गरेर बसिरहेका छन्।
४ दिनमा कुन कम्पनीले कति उडान गरे?
एयरडाइनेष्ट्रिक– १८
सिम्रिक एयर–१०
समिट–५
मनाङ–२
अल्टिच्युट–४
हेली एभरेष्ट–३
प्रभु–२
कैलाश–६
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
