काठमाडौं- इंग्ल्याण्डका क्रिकेटर एलेक्स हेल्समा कोभिड-१९ (कोरोना भाइरस) संक्रमणको लक्षण देखिएपछि उनी ‘सेल्फ आइसोलेसन’मा बसेका छन्। पाकिस्तान सुपर लिग (पिएसएल) छाडेर बीचमा नै घर फर्किएका हेल्समा लक्षण देखिएपछि नै पिएसएलका खेल स्थगित भएका थिए।
पाकिस्तान सुपर लिगले मंगलबार हुनुपर्ने सेमिफाइनल खेलहरु स्थगित गर्दै एक खेलाडीमा कोरोना भाइरसको संक्रमण देखिएको बताएको थियो। कसलाई संक्रमण भएको हो भन्ने नखुलाए पनि त्यसैकारण प्रतियोगिता स्थगित गर्नुपरेको बताइएको थियो। जसले पहिले तय भएको खेल तालिकामा चार दिन छोट्याएर प्रतियोगिता गरिरहँदा पनि पूरा हुन पाएन।
‘हामीले कसलाई संक्रमण देखिएको हो भनेर नाम भन्न मिल्दैन, तर खेलाडीमा संक्रमण देखिएको हो र उनले पाकिस्तान छाडिसकेका छन्’ पाकिस्तान क्रिकेट बोर्डका प्रमुख कार्यकारी वासिम खानले भनेका थिए।
टिमहरु मुल्तान सुल्तान र पेसेवर जाल्मी साथै कराची किंग्स र लाहोर क्वालन्डर्सबीच सेमिफाइनल खेल मंगलबार हुने तालिका रहेको थियो। त्यस्तै फाइनल खेल बुधबार नै गर्ने गरी तालिका छोट्याइएको थियो। अब नयाँ तालिकामा खेल खेलाइने बताइए पनि कहिले हुने भन्ने यकिन छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
