काठमाडौंं-विश्वमा काेराेना भाइरस (कोभिड-१९)काे संक्रमण बढेपछि पनि रोजगारीको खोजीमा विदेशिने युवाकाे संख्यामा कमी आएकाे छैन। फागुनमा महिनामा मात्र नयाँ तथा पुनः श्रम स्वीकृति लिएर ४९ हजार ५ सय ५० युवा रोजगारीको खोजीमा विश्वका विभिन्न मुलुक पुगेका छन्।
फागुनमा विदेशिनेको संख्या माघ महिनाको भन्दा बढी रहेकाे छ। माघ महिनामा ४८ हजार ६ सय युवा विदेशिएका थिए। माघकाे तुलनामा फागुनमा झण्डै १ हजार बढी विदेशिएका छन्।
फागुनमा नेपाली युवाको रोजाइ मलेसिया
फागुन महिनामा नयाँ श्रम स्वीकृति लिएरमात्रै ८ हजार २ सय युवा मलेसिया पुगेका छन्। नियमितिकरण तथा पुनः श्रम स्वीकृति गरेर १० हजारभन्दा बढी युवा मलेसिया पुगेका हुन्।
मलेसियापछि राेजगारीमा बढी युवा जाने मुलुकमा युएई परेको छ। नयाँ श्रम स्वीकृति लिएर ६ हजार ३ सय ६३ युवा युएई पुगेका छन्।
साउदीका लागि ५ हजार ८ सय युवाले नयाँ श्रम स्वीकृति लिएका छन्। नयाँ श्रम स्वीकृतिमार्फत् कतार ३ हजार १ सय ३३ पुगेका छन्। यस्तै १ हजार २ सयभन्दा बढी नयाँ श्रम स्वीकृतिमार्फत् कुवेत पुगेका छन्।
कतार जाने घटे
फागुनमा नयाँ श्रम स्वीकृति लिएर कतार जाने युवाको संख्या घटेको छ। नयाँ श्रम स्वीकृतिमार्फत् ३ हजार १ सय ३३ जना युवा कतार पुगेका छन्।
माघमा कतार जानेको संख्या फागुनको तुलनामा १ हजारभन्दा बढी थियो। माघमा ४ हजार २ सय ५५ ले नयाँ श्रम स्वीकृति लिएका थिए।
हाल नेपाल सरकारले नै सबै मुलुकमा जाने श्रमिकहरुको श्रम स्वीकृति अनिश्चितकालका लागि स्थगित गरेको छ। गन्तव्य मुलुकहरुले नेपालीहरुलाई प्रतिबन्ध लगाउनु अगावै नयाँ तथा पुनः श्रम स्वीकृति लिइसकेकाहरु रोजगारीमा गएका हुन्।
दक्षिण कोरिया, कुवेत, कतार, साउदी, मलेसियालगायत मुलुकहरुले विदेशी नागरिकहरुलाई प्रवेशमा तत्कालका लागि रोक लगाएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।