काठमाडौं–नेपाल स्टक एक्सचेन्जले कारोबार अवधि एक घण्टा थप गरेको दिन शेयर बजार ६४।१४ अंकले गिरावट आएको छ। नेप्सेले आइतबारदेखि चार घण्टाको कारोबार अवधिलाई बढाएर ५ घण्टा पुर्याएको हो।
साविकका दिनमा झैं तीन बजेसम्मको अवधिमा ५७ अंकको गिरावट भएको थियो। यसै अवधिमा एक अर्ब ६४ करोड रुपैयाँको कारोबार भएको थियो। थपिएको पछिल्लो एक घण्टाको अवधिमा शेयर बजार थप ७ अंकसहित ६४।१४ अंकको गिरावट आयो।
पछिल्लो एक घन्टा अवधिमा थप ४४ करोड रुपैयाँको कारोबार भएको छ। आइतबार दुई अर्ब १० करोड रुपैयाँको कारोबार भएको हो। कारोबार सुरु भएदेखि नै ओरालो झरेको शेयर बजार अन्तिमसम्ममा सम्पूर्ण सूचक तथा उपसूचक ओरालो झरेको छन्।
सबैभन्दा धेरै बिमा कम्पनीहरुको शेयर मूल्यमा गिरावट आएको छ। बजार सुधार हुँदा सबैभन्दा धेरै बिमा कम्पनीहरुकै शेयर मूल्य बढेको थियो। जसले गर्दा कारोबार रकम अधिकतम हुने रेकर्ड बनाइरहेको थियो।
कारोबार रकम बढ्दा नेप्से, बोर्ड र ब्रोकरले आफ्नो कमिसन बढाएका छन्। बजारमा जति धेरै कारोबार भयो त्यति नै नप्से र ब्रोकरले राम्रो पैसा कमाउछन्। दुई साता अगाडि नेप्से सूचकका साथै कारोबार रकम बढिरहेको थियो। झण्डै पौने ५ अर्बभन्दा माथिको कारोबार हुँदा बोर्ड र नेप्सेले कारोबार समय थप गर्ने जुक्ति निकालेका थिए। यसले नेप्से र ब्रोकरलाई राम्रो फाइदा हुने अवस्था थियो।
सबैभन्दा धेरै नेपाल लाइफ इन्स्योरेन्स कम्पनीको १७ करोड ३६ लाख रुपैयाँको कारोबार भएको छ। त्यस्तै एनआईसी एशियाको ११ करोड ४६ लाख रुपैयाँको कारोबार भएको छ। नेप्से सूचक ४।६६ प्रतिशतले गिरावटसँगै १३१३।०४ अंकमा रोकिएको छ। गत फागुन ८ गते शेयर बजार साढे दुई वर्ष यताकै उच्च भएको थियो। त्यसयता बजार लगातार ओरालो झर्ने क्रममा ३०३ अंकले गिरावट आयो। शेयर बजार अस्वाभाविक रुपमा बढेकाले घट्दा पनि अस्वाभाविक रुपमै घटिरहेको विश्लेषकहरु बताउछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
