गरिमा बिर्सेर प्रदेश प्रमुखहरुको दौडधुप

राजनीति

नेपाल लाइभ आइतबार, चैत २, २०७६ १५:३५

काठमाडौं- संघीय राजधानीमा सातै प्रदेशका प्रमुखहरूले दौडधुप सुरु गरेका छन्। सोमबार बिहानै सातै प्रदेश प्रमुखहरूले नेपाल कम्युनिस्ट पार्टीका कार्यकारी अध्यक्ष पुष्पकमल दाहाल 'प्रचण्ड'सँग भेट गरे। अध्यक्ष निवास खुमलटारमा सातै प्रदेशका प्रमुखसँग भेट गरेका हुन्।

सत्ताधारी दलको अध्यक्षसँगको भेटवार्ताले भने विवाद निम्त्याएको छ।

यस विषयमा नेपाल लाइभले विभिन्न प्रदेशका प्रमुखहरूसँग जिज्ञासा राखेको थियो। गण्डकी प्रदेशका प्रमुख अमिक शेरचनले आफूहरूले प्रदेशका समस्या विषयमा सामूहिक रुपमा भेटघाट गरेको बताए।

'हामीहरु पहिलोपटक सामूहिक रुपमा सातै प्रदेशका प्रदेश प्रमुखले एकमुष्ठ रूपमा पार्टी अध्यक्ष प्रचण्डलाई प्रदेशका समस्या अधिकारका विषयमा आ-आफ्नो प्रदेशले भोगेका अनुभव बाँडेका छौं,' प्रदेश प्रमुख शेरचनले भने, 'आफूहरुले काम गर्दा भोगेका असहजता र कठिनाइबारे जानकारीका गराएका छौं। कोरोना भाइरसको जोखिम न्यूनीकरणका विषयमा समन्वय गर्ने विषयमा पनि छलफल भएको छ।'

उनले नेकपाका अध्यक्ष तथा प्रधानमन्त्री केपी शर्मा ओलीलाई समेत भेट्न लागेको बताए। 'प्रधानमन्त्रीलाई पनि भेट्न लागेका छौं। प्रधानमन्त्रीले समय दिनु भएको छ। हामी अहिले सिंहदबारमा छौं।'

प्रदेश २ का प्रमुख तिलक परियारले भने कोरोना भाइरसको जोखिम न्यूनीकरणका विषयमा नै आफूहरूको भेटघाट केन्द्रित भएको बताए। 'विशेषगरी कोरोना भाइरसको जोखिम न्युनीकरणका विषयमा छलफल भएको छ,' परियारले भने, 'प्रदेशका साझा समस्याका विषयमा पनि अध्यक्षसँग छलफल भयो।'

पार्टी अध्यक्षहरुलाई भेट्नु कति उचित भन्ने विषयमा उनले टाइम सेड्युलअनुसार सबैलाई भेट्ने बताए। 'टाइम र सेड्युल अनुसार हामीले सबैलाई भेट्ने हो। सबैको समय मिलाउँदा अघिपछि जस्तो देखिएको हो। यसले खासै फरक पार्दैन,' परियारले भने।

'प्रदेशले भोगेको चुनौतीका विषयमा तपाईं मिडियाकर्मीहरू जानकार नै हुनुहुन्छ। यस विषयमा तपाईहरूले जान्न के आवश्यक छ र,' उनको प्रतिप्रश्न थियो।

संविधानविद् पूर्णमान शाक्यले संघीय प्रणालीमा देखिएका जटिलताका विषयमा गाँठो फुकाउनु पर्ने भए प्रधानमन्त्रीलाई औपचारिक रूपमा भेटेर राख्नु पर्ने बताए। ‘प्रदेश प्रमुखहरूले पार्टी अध्यक्षसंग एउटा सामान्य भेटघाट गर्न सक्छन्। अनौपचारिक कुराकानी गर्न सक्छन्,’ संविधानविद् शाक्यले भने, ‘औपचारिक रुपमा प्रधानमन्त्रीलाई प्रदेश प्रमुखले प्रदेश सञ्चालनमा देखिएका राजनीतिक, आर्थिक, कानूनी जटिलता जानकारी गराउनुपर्छ।’

पार्टी अध्यक्ष प्रचण्डलाई प्रदेश प्रमुखले भेटेर राजनीतिक संवाद र प्रदेश संचालनका जटिलता राख्न नमिल्ने शाक्यको भनाइ छ।

यस्तै, प्रदेश प्रमुखहरूले अध्यक्ष प्रचण्डलाई भेटेकोप्रति प्रमुख प्रतिपक्षी दल नेपाली कांग्रेसले आपत्ति जनाएको छ। प्रदेश प्रमुखहरूले प्रदेश प्रमुखले आफ्नो गरिमा बुझ्न नसकेको कांग्रेस प्रवक्ता विश्वप्रकाश शर्माले बताए। ‘प्रदेश प्रमुख कुनै दल विशेषका होइनन्। सामूहिक भेटको औचित्य पुष्टि प्रचण्ड आफैंले गर्नु पर्छ,’ शर्माले भने।

संघीय समाजवादी पार्टीका अध्यक्ष डा बाबुराम भट्टराईले भने प्रदेश प्रमुखहरूले राजनीतिक दलका अध्यक्ष मात्र रहेका प्रचण्डलाई भेट्नु उचित नभएको प्रतिक्रिया दिएका छन्।

'प्रदेश प्रमुख पार्टी प्रतिनिधि हैनन्,’ भट्टराईले ट्विटरमा लेखेका छन्, ‘ राज्यका प्रतिनिधि हुन्। उनीहरूले राज्यरसरकार प्रमुखलाई भेट्ने हो, पार्टी प्रमुखलाई भेट्ने हैन। कुनै एकको निजी भेटघाट हुनसक्छ, सातै जनाको एकैसाथ निजी भेट हुनसक्दैन। पार्टी र राज्यको भेद नगर्ने पुरानो कम्युनिष्ट प्रणाली यो होइन।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सिन्धुलीमा १८९ किलो गाँजासहित एक जना पक्राउ

अमेरिकाको भर्जिनियामा चार नेपाली सवार कार दुर्घटना हुँदा दुईजनाको मृत्यु

काठमाडौं महानगरका ४९७ पसल अनुगमन गर्दा २० वटामात्रै मापदण्ड अनुसारका