काठमाडौं- पोर्चुगलका फुटबल स्टार क्रिष्टियानो रोनाल्डोले आफ्ना होटल/रेस्टुरेन्टलाई अस्पतालमा रुपान्तरण गरेका छन्। जसमा कोरोना भाइरस संक्रमितको सित्तैमा उपचार हुने बताइएको छ।
कोरोनाको संक्रमण फैलँदै जाँदा विश्व खेलकुद गतिविधि प्राय ठप्प छन्। ठूला लिग फुटबलहरु रोकिएका छन्। प्रतियोगिताका मिति सारिएका छन्। केही खेलाडी र प्रशिक्षकमा नै कोरोना देखिएपछि क्वारेन्टाइनमा राखिएको छ।
१ सय ३५ देशका विभिन्न क्षेत्रमा फैलिएको कोरोनाका कारण विश्वमा १ लाख ४२ हजार ५ सय ४९ जनामा संक्रमण देखिइसकेको छ। जसमा ५ हजार ३ सय ९३ जनाको मृत्यु भएको विश्व स्वास्थ्य संगठनले जनाएको छ।
यस्तोमा रोनाल्डोले पोर्चुगलमा रहेका आफ्ना होटलमा कोरोना संक्रमितको सित्तैमा उपचार गर्ने बताएका हुन्। डाक्टर र औषधीमा लाग्ने खर्च पनि रोनाल्डो आफैले ब्यहोर्ने स्पेनिस सञ्चार माध्यमले जनाएका छन्।
रोनाल्डोले सामाजिक सञ्जालमा सबैका लागि कोरोनाको जोखिममा एकजुट भएर सामना गर्न आग्रह पनि गरेका छन्।
‘विश्व अहिले निकै अप्ठ्यारो अवस्थामा छ। यस्तोमा सबैको ध्यान र सुरक्षा त्यसैमा रहनुपर्ने देखिएको छ। अहिले म तपाइँहरुसँग फुटबल खेलाडीका रुपमा होइन, तपाइँहरुको छोरा, बुबा अझ भन्दा एक मानिसका रुपमा बोलिरहेको छु। विश्वमा नै असर परिरहेको यो अवस्थामा हामीले विश्व स्वास्थ्य संगठनले भनेका कुराहरु र नियामक निकायका अनुरोधहरु मान्नुपर्छ। मानिसको जीवन रक्षा गर्नु अरु कुनै पनि विषयभन्दा अघि हो। जसले आफ्नो परिवारका नजिकका मान्छे गुमाएका छन् उनीहरुलाई मेरो साथ छ। जो यो भाइरसविरुद्ध लडिरहेका छन् उनीहरुलाई मेरो साथ छ। संक्रमण देखिएका मेरो टिमका साथी ड्यानियल, उपचारमा संलग्न स्वास्थ्यकर्मी र यसबाट बाहिर निस्कने प्रयास गरिरहेका सबैलाई मेरो साथ सहयोग रहनेछ’ उनले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786783779.jpg)
-1786602170.png)
-1786513116.png)
