फाइल फोटो
काठमाडौं- आहा रारा गोल्डकप फुटबलको फाइनलमा शनिबार पोखरा रंगशालामा मनाङ मर्स्याङ्दी क्लब र नेपाल पुलिस क्लबले प्रतिस्पर्धा गर्दैछ। फाइनलअघि भएको प्रि-म्याच कन्फ्रेन्समा दुबै क्लबका प्रशिक्षकले उपाधि जित्ने दाबी गरेका छन्।
पुलिसले सेमिफाइनलमा थ्रीस्टार क्लबलाई ३-० गोलअन्तरले पराजित गर्दै फाइनल प्रवेश गरेको थियो। यता, मनाङले विभागीय क्लब त्रिभुवन आर्मीलाई ३-२ गोलअन्तरले पराजित गर्दै फाइनलमा स्थान बनाएको हो।
पुलिसका प्रशिक्षक अनन्त थापाले मनाङलाई पराजित गर्दै च्याम्पियन बन्ने बनाए। उनले भने, ‘मनाङ राम्रो टिम हो। स्टार खेलाडी नभए पनि मनाङले राम्रो नतिजा निकाल्दै आइरहेको छ। तर हामी फाइनलमा मनाङलाई पराजित गर्ने लक्ष्यमा छौं। हामीले ९० मिनेटसम्म आफ्नो लयमा खेल्न सक्यौं भने उपाधि जित्छौं।
पुलिसका कप्तान भरत शाह पनि साहारा क्लबविरुद्ध भन्दा थ्रीस्टारसँगको खेल राम्रो भएको र क्रमिक रुपमा झनै राम्रो भएकाले मनाङविरुद्ध पनि राम्रो गर्ने बताउँछन्।
‘हाम्रो युवा टिम हो। हामीले साहारा क्लबसँग पनि गोल गरेकै थियौं। थ्रीस्टारविरुद्धको खेल राम्रो भयो। अब फाइनलमा अझ राम्रो हुनेछ’, कप्तान भरतले भने।
मनाङका नाइजेरियन प्रशिक्षक तोपे फुजा पुलिस कमजोर टिमको रुपमा लिँदैनन्। भन्छन्, ‘पुलिस कमजोर टिम होइन। नेपालको उत्कृष्ट टिममध्येको एक हो। हामी जित्नको लागि खेल्ने छौं।’
मनाङका कप्तान कमल श्रेष्ठले सबै खेलाडी फिट रहेका अनुसार नतिजा पनि राम्रो आउने बताए। उनले भने, ‘हामीले सेमिफाइनल खेल पुलिसको हेरेका थियौं। हामीले फाइनलमा त्यहि अनुसारले रणनीति बनाउने छौं। प्रशिक्षकको योजना अनुसार हामी खेल्छौं। हामीसँग कुनै खेलाडी पनि घाइते छैन। सबै फिट छन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
