काठमाडौं- उद्योग, वाणिज्य तथा आपूर्ति राज्यमन्त्री मोतीलाल दुगडले हाल बन्द र रुग्ण अवस्थामा रहेका सार्वजनिक संस्थानहरुलाई सार्वजनिक-निजी साझेदारी(पिपिपी मोडल) मा पुनर्संरचना गरिने बताएका छन्।
राज्यमन्त्री दुगडले बुधबार आफ्नै कार्यकक्षमा संचारकर्मीहरुसँग कुरा गर्दै सार्वजनिक संस्थानमा सरकारले अब थप लगानी नगर्ने, बरु सार्वजनिक-निजी साझेदारीलगायत अरु विभिन्न मोडलमा पुनर्संरचना गर्ने सरकारको तयारी रहेको बताएका हुन्।
‘सरकारले अब सार्वजनिक संस्थानमा एक पैसा पनि हाल्दैन। बरु आफ्नो स्वामित्वमा राखेर पिपिपी मोडलमा लगाउने, निजी क्षेत्रलाई पुरै भाडामा दिनेलगायतका विभिन्न मोडलमा पुनर्संरचना गर्छौं,’उनले भने।
सार्वजनिक संस्थानमा पिपिपी मोडलमा लगानी गर्न भारतसँग आग्रह गरेको पनि राज्यमन्त्री दुगडको भनाइ छ। ‘भारत सरकार र त्यहाँको निजी क्षेत्रसँग यस विषयमा कुरा भइसकेको छ। अब हामी चुप लागेर बस्दैनौं। केही न केही गर्छौं। इतिहास फेर्नका लागि भएपनि सरकारले यो काम गर्छ,’ उनले भने।
मार्च ६ र ७ मा भारतमा आयोजना भएको इकोनोमिक टाइम्स ग्लोबल बिजनेस समिटका क्रममा भारत गएका राज्यमन्त्री दुगडले त्यहाँको निजी क्षेत्र र भारत सरकारसँग यस विषयमा छलफल गरेको बताएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
