काठमाडौं- इंग्ल्याण्डका अलराउण्ड क्रिकेटर क्रिस वेक्सले इन्डियन प्रिमियर लिग (आइपिएल) नखेल्ने भएका छन्। दुई लाख ७ हजार डलरमा आइपिएल टिम दिल्ली क्यापिटलमा आबद्ध भएका उनले आफ्नो नाम फिर्ता लिएका हुन्।
३१ वर्षका वेक्सले इंग्ल्याण्डबाट नै आफ्नो क्रिकेट जीवन अझ राम्ररी अगाडि बढाउने र खेल समय इंग्ल्याण्डकै लागि खर्च गर्ने निर्णय गर्दै आइपिएलबाट नाम फिर्ता लिएको बताइएको छ। विशेष त टी २० विश्वकपमा केन्द्रित भएर बढ्ने योजना रहेको उनलाई उल्लेख गर्दै क्रिकइन्फोले लेखेको छ।
‘म जति सक्दो समय इंग्ल्याण्डका लागि नै क्रिकेट खेल्न चाहन्छु। अहिलेसम्मका लागि मेरो लक्ष्य नै त्यही हो’, टेस्ट सिरिजका लागि अहिले श्रीलंकामा रहेका वेक्सले भनेका छन्, ‘मैले केही समय आफ्ना लागि आराम पनि चाहिन्छ भन्ने सोचेको छु। आइपिएल राम्रो प्रतियोगिता हुँदा हुँदै पनि अहिलेका लागि भने मैले नखेल्ने निर्णय लिएको छु।’
विश्वभर ठूला खेलकुद गतिविधि स्थगित भइरहँदा र कतिपय प्रतियोगिता दर्शकबिना बन्द रंगशालामा गर्ने निर्णइ भइरहँदा आइपिएल भने स्थगित नहुने भारतीय क्रिकेटको सर्वोच्च निकाय बिसिसिआईले नै जनाएको छ। आइपिएल चैत १६ गतेदेखि सुरु हुने तालिका रहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।