काठमाडौं- विश्वकप फुटबल छनोटको दोस्रो चरणमा नेपालले आफ्नै घरेलु मैदानमा चाइनिज ताइपेई, अष्ट्रेलिया र जाेर्डनसँग खेल्ने खेल स्थगित भएकाे छ।
विश्वव्यापी रुपमा फैलिएको कोरोना भाइरसको कारण विश्वकपको दोस्रो चरण तथा एसियन छनोटको मार्च २३ र ३१ तथा जुन १ र ९ मा हुने खेलहरु एएफसीले स्थगित गरेको हो। नेपालले मार्च २३ तारिखमा चाइनिज ताइपेईसँग दशरथ रंगशालामा प्रतिस्पर्धा गर्ने पूर्व खेल तालिका थियो। त्यस्तै, अष्ट्रेलियासँग मार्च ३१ तारिखमा दशरथ रंगशालामै नेपालले खेल्ने तालिका थियो। त्यस्तै, जुनमा हुने नेपाल र जोर्डनबीचको खेल पनि रोकिएको छ।
एसियन फुटबल महासंघले विश्व फुटबल महासंघ (फिफा) सँग छलफल गरेपछि स्थगित भएका खेलहरुको तालिका सार्वजनिक गर्ने उल्लेख गरेको छ।
अखिल नेपाल फुटबल संघ (एन्फा) ले फागुन १८ देखि राष्ट्रिय टिमको अभ्यास गराएको थियो। तर कोरोनाको कारणले गर्दा फागुन २३ गते नै अभ्यास रोकेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।