काठमाडौं- तीव्रगतिमा बढिरहेको शेयर बजारमा करेक्सन हुँदा मंगलबार पनि लगातार तेस्रो सर्किटसहित कारोबार बन्द भएको छ। गत सातामा पनि शेयर बजार अधिकतम घट्ने क्रममा कारोबार नै बन्द भएको थियो।
पहिलो एक घण्टाभित्र ४ प्रतिशतले नेगेटिभ सर्किट लाग्दा २० मिनेटका लागि कारोबार बन्द गरिएको थियो। पहिलो सर्किट लागेको तीस मिनेटमै ५ प्रतिशतको गिरावट भएपछि दोस्रो सर्किट लागेर कारोबार बन्द भयो।
दोस्रो सर्किट खुलेको केहि मिनेटमै ६ प्रतिशतले सर्किट लागेपछि आज दिनभरिका लागि कारोबार बन्द भएको छ।
मंगलबार ८६.३९ अंकको गिरावट हुँदा नेप्से सूचक १३४९.३१ अंकमा झरेको छ। यसै अवधिमा एक अर्ब ७ करोड रुपैयाँको कारोबार भएको छ। १२ वटा कम्पनीको शेयर मूल्य ९ प्रतिशत भन्दा माथिले घटेको छ। जम्मा १६१ वटा कम्पनीको कारोबार हुँदा १३९ वटा कम्पनीको शेयर मूल्य घटेको छ भने ६ वटाको मूल्यमा सामान्य सुधार देखिन्छ।
तीन महिनाको अवधिमा शेयर बजार ५२३ अंकले सुधार भएको थियो। लगानीकर्ताहरुले अर्थमन्त्रीको हल्ला फैलाएर तीन महिनाको अवधिमा ११०९ अंकबाट १६७२ अंकसम्म पुगेको थियो। बजार सुधार हुन थालेसँगै पौने तीन अर्ब रुपैयाँसम्मको कारोबार भयो। इतिहासकै अधिकतम कारोबार भएको भन्दै नेपाल स्टक एक्सचेन्जमा मिडाइ नै बाँडिएको थियो। यसै अवधिमा नेपाल धितोपत्र बोर्डका अध्यक्षदेखि स्वयं अर्थमन्त्री नै बजार सुधार भएको भन्दै जसपूर्ण अभिव्यक्ति दिन थालेका थिए।
यस अवधिमा भएको सुधारलाई लगानीकर्ताले 'ब्लडी बुल'को संज्ञा दिएका थिए। यस्तो बुलले बजारमा धेरै लगानीकर्ताहरुलाई फसाउने विश्लेषण गरिन्छ। जसरी बजार सुधार भइरहेको थियो सधै त्यसरी नै सधैं सुधार नहुने बजार विश्लेषकहरु बताउँछन्। परिणाम पछिल्लो एक सातामै २६८ अंकले तल झर्याे। लगानीकर्ताहरुले आजदेखि बजार सुधार हुने प्रक्षेपण गरेका थिए। तर, सोमबार अन्तर्राष्ट्रिय बजारमा पनि कोरोना भाइरसको प्रभावले नेगेटिभ सर्किट लागेको थियो।
कोरोनाले विश्व अर्थतन्त्रमै ठूलो प्रभाव पार्दै आरहेको छ। यस्तो अवस्थामा लगानीकर्ताहरुले शेयरमा भन्दा सुरक्षित क्षेत्रको रुपमा सुन तथा डलरमा लगानी बढाइरहेका छन्। कोरोनाले कम्पनीहरुको व्यवसायमा प्रभाव पार्दै गर्दा उनिहरुको वित्तीय विवरण पनि खुम्चिन्छ। कम्पनीको नाफा खुम्चिएसँगै कम्पनीको शेयर मूल्यमा पनि भारी गिरावट आउँछ।
यति धेरै ठूलो गिरावटसँगै पछिल्लो एक महिनाको अवधिमा शेयर खरिद गर्नेहरु ठूलो घाटामा देखिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
