काठमाडौं- इटालीमा कोरोना भाइरसबाट सुरक्षा अपनाउन सबै खेलकुद गतिविधि बन्द गरिने भएको छ। कोरोनाको जोखिम कम नहुँदासम्मका लागि कुनै खेलकुद गतिविधि नगरिने इटालीका प्रधानमन्त्री जुसेप्पे कोन्टेले बताएका छन्।
यसमा इटालियन लिग फुटबल सिरि ए का खेलहरु पनि बन्द गरिने भए पनि क्लबले गर्ने अन्तर्राष्ट्रिय प्रतिस्पर्धामा भने रोक लगाइएको छैन। सिरि ए का खेलहरु यसअघि अप्रिल ३ सम्मका लागि बन्द रंगशालामा गरिने पनि उल्लेख गरिएको थियो।
खेलकुद गतिविधिसँगै भिडभाड हुने अन्य सबै कार्यक्रम पनि बन्द गरिएका छन्। त्यसअघि इटालीको ओलम्पिक कमिटीको बैठक बसेर सबै खेलहरु बन्द गर्ने बारेमा छलफल भएको थियो।
इटालीमा मात्र ९ हजारभन्दा बढी मानिसमा कोरोनाको संक्रमण भेटिएको छ। जसका कारण ४ सय ५० भन्दा बढीको ज्यान समेत गइसकेको छ। चीनबाट सुरु भएको कोरोना भाइरसको जोखिम युरोपसम्म पुगेसँगै अन्तर्राष्ट्रिय खेलकुद गतिविधिसमेत प्रभावित भएको हो। २०२० मा नै हुने युरो कप फुटबल र जापानमा हुने ओलम्पिक खेलकुदसमेत स्थगित हुने खतरा बढिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
