काठमाडौं- भारतलाई ८५ रनले हराउँदै अस्ट्रेलियाले महिला टी२० विश्वकप क्रिकेटको उपाधि जितेको छ। अस्ट्रेलियाले दिएको १ सय ८५ रनको लक्ष्य पछ्याएको भारतले ९९ रन मात्र बनाउन सकेको हो।
टी२० महिला विश्वकपको सातौँ प्रतियोगिता सकिँदा अस्ट्रेलियाको यो पाँचौँ उपाधि हो। अस्ट्रेलियाले सन् २०१०, २०१२ र २०१४ मा लगातार तीन साथै २०१८ मा पनि उपाधि जितेको थियो। २००९ को पहिलो उपाधि इंग्ल्याण्डले साथै २०१६ मा वेस्ट इन्डिजले उपाधि जितेको थियो।
भारतविरुद्ध टस जितेर पहिले ब्याटिङ रोजेको अस्ट्रेलियाले पूरा २० ओभर खेल्दै ४ विकेट जाँदा १ सय ८४ रन बनाएको थियो। १ सय ८५ रनको लक्ष्य पछ्याएको भारतले १९.१ ओभरमा ९९ रन बनाउँदा सबै विकेट गुमाएको हो।
पहिले ब्याटिङ गरेको अस्ट्रेलियाका लागि अलेसा हिलले ३९ बलमा ७५ रन बनाएकी थिइन्। बेथ मुनिले ५४ बलमा अविजित रहँदै ७८ रन बनाएकी थिइन्। भारतीय ब्याटिङ भने फाइनल खेलमा चल्न सकेन। दिप्ती शर्माले ३३, वेदा कृष्णमूर्तिले १९, ऋचा घोषले १८ साथै स्मृति मन्दनाले ११ रन बनाउनुबाहेक अरु खेलाडीले दोहोरो अंकमा रन जोड्नसमेत सकेनन्।
अस्ट्रेलियाका लागि मेगन स्कटले चार, जेस जोनासेनले तीन साथै सोफी मोलिनेक्स, डेलिसा किमिन्स र निकोला क्यारेले एक–एक विकेट लिए।
सेमिफाइनलमा भारतले इंग्ल्याण्डलाई साथै अष्ट्रेलियाले दक्षिण अफ्रिकालाई हराएको थियो। प्रतियोगितामा समूह चरणको पहिलो खेलमा भने भारतले अस्ट्रेलियालाई १७ रनले हराएको थियो। जसमा भारतले दिएको १ सय ३२ रनको लक्ष्य पछ्याएको अस्ट्रेलियाले १ सय १५ रन बनाउँदा सबै विकेट गुमाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
