काठमाडौं–कोरोना संक्रमण त्रासको असर नेपाली फिल्ममा पनि देखिन थालेको छ। निर्माताहरु फिल्म रिलिज नै रोक्न थालेका छन्। फागुन ३० मा रिलिजको तयारीमा रहेको ‘म यस्तो गीत गाउँछु २’ प्रदर्शन मिति अनिश्चित बनेको छ।
फिल्म निर्माता सुदर्शन थापाले कोरोना भाइरसका कारण घोषित मितिमा फिल्म रिलिज गर्न नसकिएको बताए। उनले भने, ‘सरकारले धेरै मानिस एकै ठाउँमा भेला नहुन, भीडभाडमा नजान निर्देशन दिएको छ, त्यसमा ऐक्यबद्धता जनाउँदै हामीले फिल्म प्रदर्शन रोकेका हौं।’
अहिले ‘आमा’ र ‘सेन्टी भाइरस’ हलमा छन्। कोरोना प्रभावका कारण तिनीहरुको दर्शक पनि घटिरहेका छन्।
अर्कोतिर शुक्रबारबाटै टाइगर श्राफ अभिनित ‘बागी ३’ रिलिज भएको छ। निर्माण पक्ष बागीको तेस्रो सिक्वेलको प्रभाव देखेर पनि ब्याक भएको हो। पहिले ‘म यस्तो गीत गाउँछु २’ को रिलिज मिति फागुन २३ मा तय गरिएको थियो। तर सोही दिन ‘बागी ३’ आउने भएपछि निर्माण पक्षले रिलिज मिति फागुन ३० मा सारेको थियो।
यस अगाडि रिलिज भएको बागी २ ले समेत नेपालमा राम्रो ब्यापार गरेको थियो। त्यही देखेर कुनै नयाँ नेपाली फिल्म बागी ३ सँग जुध्ने हिम्मत जुटाउन सकेनन्। ‘म यस्तो गीत गाउँछु २’मा पल साह, पुजा शर्माको मुख्य भूमिका छ भने सुदर्शन थापाले फिल्मको निर्देशन गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
