काठमाडाैं- भाैतिक पूर्वाधार तथा यातायातमन्त्री वसन्त कुमार नेम्बाङले काठमाडाैं उपत्यकाभित्रका सडकका खाल्डाखुल्डी पुर्ने कामलाई मन्त्रालयले विशेष उपलब्धिका रुपमा लिएकाे बताएका छन्। उनले सडक विभागअन्तर्गत रहेका २४ हजार ३ सय वर्ग मिटर अर्थात् ९ हजार ५ सयवटा खाल्डा पुर्ने काम सम्पन्न भएकाे जानकारी गराए।
आफूले मन्त्रालय सम्हालेकाे एक सय दिन पूरा भएकाे अवसरमा शनिबार आयाेजित पत्रकार सम्मेलनमा उनले उपत्यकाका सडकलाई धुलाे र खाल्डाखुल्डीरहित बनाउने याेजनामा प्राप्त गरेकाे सफलतालाई मन्त्रालयले विशेष उपलब्धिका रुपमा लिएकाे बताएका हुन्। उपत्यकाकाे २७ किलाे मिटर सडक मर्मत भएकाे उनले बताए।
उनले हिउँदकाे समय भएकाले सडक कालाेपत्रे गर्ने काममा उल्लेख्य सफलता प्राप्त हुन नसकेकाे बताए। यातायातमन्त्री नेम्बाङले यसै आर्थिक वर्षको अन्त्यसम्ममा काठमाडौं उपत्यकामा थप ८५ किलोमिटर सडक कालोपत्रे गर्ने लक्ष्यसहित काम भइरहेको जानकारी दिए। आर्थिक विकासका लागि भाैतिक पूर्वाधारकाे विकास हुनु अपरिहार्य रहेकाे उनले बताए।
७ वटा चोकहरुमा ट्राफिक लाइट बालिएको, बल्खु, महालक्ष्मीस्थान र बानेश्वरमा आकाशे पुल निर्माण थालिएको, कलंकी–महाराजगञ्ज सडक बिस्तारको काम थालिएको लगायतका विषयलाई प्रगति विवरणमा समेटिएको छ। रुग्या ठेक्काको म्याद थप गर्ने सार्वजनिक खरिद नियमावलीको नवौं संशोधनको व्यवस्थाअनुसार मन्त्रालय अन्तर्गतका करिब १५ सयवटा रुग्ण आयोजनाको म्याद १ वर्ष थप गरिएको समेत मन्त्री नेम्बाङले जानकारी गराए।
उनले तीनवटा विषयलाई व्यवस्थित गर्ने साेंच मन्त्रालयले बनाएकाे बताए। उनले भने, 'नीतिगत सुधारका कुराहरु, सांगठनिक सुधारका कार्यहरु र विकास निर्माणलाई तीव्रता दिने र त्यसकाे पर्याप्त अनुगमन सुपरीवेक्षण गर्दै समस्याहरुलाई निराकरण गर्दै विकास र निर्माणकाे गतिलाई तीव्रता दिने यी तीनवटा साेंचहरु हामीले राखेका छाैं।' उनले ती साेंचहरु मन्त्रालयकाे तर्फबाट गरिने निरन्तरताका कार्य भएकाे बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
