काठमाडौं–सेक्युरिटी प्रेस खरिद प्रक्रियामा कमिसन ‘डिल’ गरेको अडियो बाहिरिएपछि राजीनामा दिएका पूर्व सञ्चारमन्त्री गोकुल बाँस्कोटाले आफूमाथि झूठो आरोप लगाएको दाबी गरेका छन्।
अडियो सार्वजनिक गर्ने विजयप्रकाश मिश्रविरुद्ध शुक्रबार जिल्ला अदालत काठमाडौंमा गाली बेइज्जति मुद्दा दर्ता गरेका उनले रकम लेनदेन गर्ने हिसाबले आफूले कसैसँग कुरा नगरेको दाबी गरेका हुन्।
‘प्रतिवादीबाट सृजित कथित अडियो टेपमा कुनै सत्यता छैन,’ जिल्ला अदालत काठमाडौंमा दायर गरेको मुद्दामा बाँस्कोटाले भनेका छन्, ‘रकम लेनदेन गर्ने
हिसाबले कसैसँग मैले कुरा गरेको छैन। मलाई फसाउने उद्देश्यले रचिएको प्रपञ्च हो भन्ने कुरा यस सम्वन्धमा मैले लिएको निर्णय र कार्यवाट नै स्पष्ट भैसकेको छ।’
बाँस्कोटाले भ्रष्टाचार गर्ने कुनै मनसायसमेत आफूले नराखेको दाबी गरेका छन्। उनले भनेका छन्, ‘कुनै पनि भ्रष्टाचार हुनका लागि
मनसाय, तयारी तथा कार्यको विद्यमानता हुनुपर्दछ। मबाट भ्रष्टाचारजन्य काम गर्ने मनसाय देखाउने, सोही मनसायलाई कार्यान्वयन गर्ने गरी योजना बनाउने, तयारी
गर्ने वा त्यसलाई कार्यान्वयन तहमा पु¥याउने कार्य भएको छैन ।’
कमिसन ‘डिल’ गरेको अडियो बाहिरिएपछि उनले फागुन ९ मा राजीनामा दिएका थिए। उनीमाथि भ्रष्टाचारको विषयमा अनुसन्धान हुनुपर्ने दबाब छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
