काठमाडौं–ट्रान्सपरेन्सी इन्टरनेसनल नेपालले भ्रष्टाचार प्रकरणमा संग्लग्न तत्कालीनमन्त्री गोकुल बाँस्कोटासहित अन्य मतियारहरुमाथिको कारबाही प्रक्रिया निष्पक्ष तथा निर्भिकतापूर्वक यथाशीघ्र अघि बढाउन अख्तियार दुरुपयोग अनुसन्धान आयोगलगायत सम्बन्धित निकायको ध्यानाकर्षण गराएको छ ।
अध्यक्ष खेमराज रेग्मीले विज्ञप्ति जारी गर्दै सरकारले भ्रष्टाचारविरुद्व शून्य सहनशीलताको नीति अपनाउने घोषणा गरे पनि व्यवहारमा त्यो नदेखिएको बताएका छन्। उनले कहिले मन्त्रिपरिषद्को नीतिगत निर्णयका नाममा त कहिले सरकार–सरकारका बीचमा हुने खरिद सम्झौताका नाममा भएका भ्रष्टाचारका प्रकरणले वर्तमान सरकारको भनाइ र गराइमा सामान्जस्यता नदेखिएको अनुभूति हुन थालेको जनाएका छन् ।
हालै मात्र सेक्युरिटी प्रेस खरिद प्रकरणमा तत्कालीन मन्त्री बाँस्कोटा र दलालका बीचमा ७० करोडभन्दा बढी रुपैयाँ कमिसनको नाममा भ्रष्टाचार गर्ने बदनियतबाट बार्गेनिङ्ग भइरहेको श्रव्य सामग्री प्रचारमा आएपछि सुशासन र समृद्धिको नारा दिइरहेको वर्तमान सरकारको विश्वसनीयतामाथि समेत ठूलो प्रश्नचिन्ह खडा भएको विज्ञप्तिमा उल्लेख छ।
प्रधानमन्त्रीको अति विश्वासप्राप्त मन्त्रीबाटै नेपाली जनताको खुन पसिनाको कमाइबाट संकलित राजस्वको ठूलो रकम दलालसँगको मिलिभगतमा भ्रष्टाचार गर्न लागिएको दुष्प्रयासलाई गम्भीर अपराधको रुपमा लिनुपर्ने ट्रान्सपरेन्सीनेपालको भनाइ छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
