काठमाडाैं- नेपाल कम्युनिस्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले पार्टीमा बहस चलिरहने भन्दै मिडियामा आएका कुराकाे पछि नलाग्न आग्रह गरेका छन्। काठमाडाैंमा बिहीबार आयाेजित बागमतीस्तरीय पार्टी प्रशिक्षण कार्यक्रममा उनले दुई अध्यक्षबीच विवाद भइरहने बताए।
'पार्टी भनेको जमेको पोखरी होइन, गड्गडाएर अगाडी बढ्छ। यहाँ विवाद र बहस चलिरहन्छ। आजभोलि के हो भन्ने जस्तो भएको छ। हामी धेरै ठूलो दुःख र मेहनतले यहाँ ल्याएको हो। यहाँ करोडौं जनताको आशा छ,' उनले भने, 'विभाजन र विघटन हुन दिने छैनाैं। हामी दुई अध्यक्ष तपाईंहरु तर्सिने गरी विवाद गर्दछौं। हिजो र आज केही गरेका छौं। केही केही मिडियामा आएको छ। त्यसको पछि नलाग्नुस हामी मिलाउँछौं। यसलाई विभाजन गर्ने प्रतिक्रियावादीलाई सफल हुने दिने छैनौं।'
उनले नेकपालाई केही दशकसम्म देशकाे नेतृत्व गर्ने पार्टी बनाउने बताए। सत्तामा गएपछि कम्युनिस्ट पार्टी आफै सकिने हुदाँ यसमा आफूहरु गम्भीर रहेकाे उनले बताए। 'शान्तिपूर्ण रुपमा अगाडि जाने सहमति नभएको भए यो एकता सम्भव थिएन,' उनले भने, 'यहाँ कसैले एक अर्कालाई शंका गर्न आवश्यक छैन।'
बामदेम गौतम गृहमन्त्री भएको समयमा आफूहरुलाई सिध्याउने कानुन नै निर्माण गरेर अभियान सुरु भएको स्मरण गर्दै भने, 'हामी एक अर्कामा मिल्ने र बार्गेनिङ गर्ने दुवै जनयुद्धको समयमा पनि भएको थियो। पार्टी एकताको श्रृंखलाबद्ध वार्ता गरेका थियौं। सातौं पटकसम्म हामीले छलफल गरेका थियौं। तत्कालीन समयममा महासचिव माधव नेपाल हुनुहुन्थ्यो। तर हामीलाई उहाँले पत्याउनु भएन। ५०/ ५० गरौं भनेको थिएँ।'
'मैले ४५ सिटसम्म मागेको थिए। निर्वाचन एक्लै लड्यौं। तर नसोचेको मत आयो' उनले भने, 'हामीभित्र तत्कालीन समयमा उन्माद भयो। हामी फेरि २६मा आयौं। हाम्रो दारा नङग्रा भाचियो। यहीबाट हामीले सिक्यौं। अब मिल्नुको विकल्प हामीले देखेनौं।'
फरक प्रसंगमा उनले नेपालको सीमा मिच्न सरकारले नदिने बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।