काठमाडाैं- समाजवादी पार्टीका अध्यक्ष एवं पूर्वप्रधानमन्त्री डा बाबुराम भट्टराईले जनताकाे सम्पत्ति जनतालाई नै दिनुपर्ने सिद्धान्तअनुसार नै नीतिगत निर्णय गरेर जनतालाई भाेगचलनका लागि दिएकाे बताएका छन्।
मातातीर्थकाे सरकारी जग्गा व्यक्तिका नाममा गरिदिएको आरोप लागेपछि डा भट्टराईले ट्विट गर्दै आफू ‘जसको जोत उसको पोत’ भन्ने नारासहित क्रान्तिमा होमिएकोले जनताले भोगचलन गरेको जमीन जनतालाई नै दिएकाे बताए।
उनले लेखेका छन्, 'मातातीर्थ क्षेत्रको जमीनमा पुस्तौंदेखि खनजोत गरिरहेका यी निस्सहाय गरीब/दलितहरूको अधिकार खोसेर यति होल्डिंग्स र आसेपासेलाई सुम्पने ओली सरकारको षड्यन्त्रलाई सबैले बेलैमा बुझौं र परास्त गरौं! कुरा प्रष्ट छ-ओली जोताहाको जमीन ट्रष्ट हुँदै यतिलाई दिन खोज्ने तर बाबुराम जोताहालाई नै दिने!'
सरकारी जग्गा व्यक्तिका नाममा गरिदिएको आरोप लागेपछि पूर्वप्रधानमन्त्री डा भट्टराई स्थानीयबासीलाई भेट्न मंगलबार चन्द्रगिरी नगरपालिकाको मातातीर्थमा पुगेका थिए। सरकारले चालेकाे कदमप्रति सत्तारुढ नेपाल कम्युनिष्ट पार्टी (नेकपा)का केही स्थानीय नेताहरु रुष्ट रहेकाे आफूले पाएकाे डा भट्टराईले बताए। डा भट्टराईले नक्कली कम्युनिस्टको विरोध नेकपाकै नेता/कार्यकर्ताबाट समेत भएको पाउँदा खुसी लागेकाे बताएका छन्।
उनले ट्वीट गर्दै भनेका छन्, 'महेन्द्रले समेत २०२६ सालमै छोडिसकेको र मोही/जोताहाको नाममा दर्ता भएको जग्गा खोसेर राजाको नाउँमा हुनुपर्छ भन्ने ओली मार्का नक्कली कम्युनिष्टको विरोधमा स्थानीय जनता मात्र हैन नेकपाकै नेता/कार्यकर्ता समेत भएको पाउँदा खुशी लाग्यो। यस्तै जागरण भूइँतहमा भैरह्यो भने ओलीतन्त्र छिटै ढल्नेछ!
यसैबीच, पूर्वप्रधानमन्त्री डा भट्टराईले बुधबार आफूमाथि लागेकाे आराेपबारे संसदमा कुरा राख्ने भएका छन्। भट्टराईका प्रेस सल्लाहकार विश्वदीप पाण्डेले मातातीर्थ जग्गा प्रकरणमा उठेका प्रश्नबारे भट्टराईले कानुनी, राजनीतिक, नैतिक सबै कोणबाट संसदबाटै जवाफ दिन लागेकाे जनाकारी दिए।
फेसबुकमा पाण्डेले लेखेका छन्, 'प्रमज्यू, यती काण्ड, गोकुल काण्ड, जन्मदिनमा हेलिकोप्टरमा केक लगेर काटेर गरिएको राजसी ठाँटबाँठ काण्ड हुँदै धेरै काण्डै काण्डको दलदलमा तपाईं फसिसक्नुभएको छ। हिन्दीमा एउटा उखान छ- ‘हम तो डुबेंगे सनम, साथमे तुमको भि डुबाएंगे। यस्तै आफू डुब्ने निश्चितप्रायः देखेपछि आफूलाई मन नपर्नेजति सबैलाई डुबाउन सकिन्छ कि भनेर असफल प्रयास गरिराख्नुभएको छ। त्यो हामी सफल हुन दिँदैनौं। आज १ बजे संसदमा तपाईंको इजार राम्रोसँग कसेर आउनुहुन अनुरोध छ। तपाईंले पूर्वप्रम बाबुराम भट्टराईप्रति संकेत गर्दै मातातीर्थको जग्गा प्रकरणमा उठाउनुभएको प्रश्नलाई कानुनी, राजनीतिक, नैतिक सबै कोणबाट तपाईंलाई आज संसदबाटै जवाफ दिनुहुनेछ। ‘कम्युनिष्ट' सरकारले 'जनताको जोत, यति होल्डिङ्सको पोत’ बनाउन खोजे पनि हामी त्यसो हुन दिँदैनौ। 'जसको जोत, उसको पोत' नै हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
