इटहरी- इटहरी १० का रसिलाल चाैधरीको घरमा धेरै मान्छे जम्मा भएका छन्। पिँढीमा महिलामात्रै छन्। सन्नाटा छाएकाे छ। उनीहरु आपसमा कुरा गरेका छैनन्। कारण थियाे शाेक। रसिलाल र उनकी श्रीमती बुधुनीदेवीसहित डुमटक्का गाउँले मात्रै ६ जना गुमाएकाे छ।
बुधबार साँझ भारतमा भएकाे दुर्घटनामा उनीहरुकाे मृत्यु भएकाे हाे। रसिलालकी बहिनी फुलसरीदेवी पनि दुर्घटनामा परिन्। एकै परिवारका ३ जनासहित १० जनाको मृत्यु भइसकेको छ। त्यसमध्ये ६ जना एउटै टोलका परेका छन्।
इटहरी चाेकदेखि ४ किलोमिटरको दक्षिणपूर्वी डुमटक्का गाउँ नै अहिले शोकमा छ। तीर्थयात्रामा निस्किएकाहरुको मृत्युले गाउँ शोकमा परेकाे हाे।
७४ वर्षका रसिलालको अन्तिम इच्छा थियो चारधाम जाने। इच्छा पूरा गर्न हिंडेका उनी कहिल्यै नफर्कने गरी बिदा भए। चाँडै आउँलान्, कोसेली ल्याउलान् भन्ने परिवारकाे आश अब कहिल्यै पूरा नहुने भएकाे छ।
बुधुनीदेवीकी दिदी भर्खरै ८० लागिन्। उनी अहिले बहिनीकै घरमा छिन्। पिँढीमा गुन्द्री ओछ्याएर बसेकी उनी छटपटीमै छन्। कहिले उठ्ने, कहिले टहलिने गर्छिन् उनी। हिड्ने अघिल्लो दिन बहिनीले भेटेको सम्झँदै भक्कानिन्छिन्। 'म कोसेली ल्याउँला भन्थी,' गहभरी आँसु पार्दै उनी भन्छिन्, 'कोसेली हैन आफूमात्रै आइछन् बुधुनी।'
उनको बोली प्रष्ट बुझिदैन। बहिनीकाे अभावमा छटपटाइरहेकी छन्। उनकै छेउमा बुधुनीदेवीकी नातिनी सुतिरहेकी छन्। धेरै रोएर थाकेकी उनी बोल्न पनि सक्ने अवस्थामा छैनन्।
ढोकामा अडेस लगाएर कान्छी बुहारी टाेलाइरहेकी छन्। अरु बुहारीहरु पनि उसैगरी चुपचाप छन्।
.jpg)
यत्तिकैमा शिवनारायण चौधरी आइपुग्छन्। रसिलाल उनका ठूलाबाबु हुन्। बुधुनीदेवीका बहिनीका छोरा हुन् शिवनारायण।
उनलाई तीनतिरको शोक परेको छ। उनकी काकी फुलसरी देवीको पनि सोही यात्रामा मृत्यु भयो। फुलसरी रसिलालकी बहिनी हुन्। शिवनारायणका अर्का आफन्तको पनि मृत्यु भएको छ।
एकैपटक तीन घरमा परेको शाेकले आफूमाथि ठूलो बज्रपात भएको उनी सुनाउँछन्। ‘तिमी छौ हामी आउन्जेल रेखदेख गर्दै गर्नु भनेर गएका थिए,’ भावुक हुँदै उनी भन्छन्, ‘तर कहिल्यै नआउने गरी गएको भनेनन्। अहिले मलाई तीनतिरको भार छ।’
बुधबार राति भारतको तमीलनाडुमा नेपाली तीर्थयात्रु बोकेको बस दुर्घटनामा परेकाे हाे। दुर्घटनामा इटहरी उपमहानगरपालिका १० का ६ सहित १० जनाको मृत्यु भयो। एउटै टोलका वीरबहादुर राई, गोपाल तामाङ, फूलसरी चौधरी, बुधनी चौधरी, टीकाराम चौधरी, रसिलाल चौधरीको मृत्यु भएकाे छ। बुढेसकालमा तीर्थ जाने र धर्म कमाउने भन्दै हिँडेका उनीहरु कहिल्यै नफर्कने गरी बिदा भए।
६८ वर्षीय वीरबहादुर राई (ससुरा)को मृत्युपछि मधुमाया राईको घरमा चुल्हो बलेको छैन। ५५ वर्षीया सासू मञ्जुदेवी गम्भीर घाइते छन्। उनका श्रीमान् र जेठाजु बाबुआमा खोज्न गएका छन्। उनी भने घरमा एक्लै टोलाइरहेकी छन्। दिनभर आफन्त र छिमेकी आएर सान्त्वना दिए पनि मधुमायाको मन पोलिरहेको छ।
यता टिकाराम चौधरीको घरमा पनि त्यस्तै शोकको वातावरण छ। मृत्युको खबर सुन्नेबित्तिकै उनकी श्रीमती बेहोस भइन्। त्यसपछि गाउँलेले ‘उपचार गर्न लगेको छ रे!’ भन्दै उनलाई सान्त्वना दिइरहेका छन्। अहिले पनि उनी बेलाबेला मुर्छा पर्छिन्।
.jpg)
गोपाल तामाङ यसअघि पनि परिवारसँग सल्लाह नगरी हिड्ने गर्थे। जसले जहाँ जाउँ भन्यो त्यही हिड्ने उनको बानी थियो। यसपालि पनि उनी यताउता जान्छु नभनी घरबाट निस्केका थिए। घर छाडेको १५ दिनको दिन उनले संसार नै छाड्नुपर्याे।
माघ २३ गते इटहरीबाट छुटेको को १ ख ५३३४ नम्बरको बस भारतको सलेम बैंगलोर सडकखण्डमा दुर्घटनामा परेकाे हाे। मृतकका आफन्तका अनुसार होटेल खोज्न जाने क्रममा रोकिराखेको बसमा आएर ट्रकले ठक्कर दिएको थियो।
मृतकमध्ये इटहरीका ६ जनासहित १० जनाको शव ल्याउन पहल गर्ने इटहरी उपमहानगरपालिकाले निर्णय गरेको छ। साथै मृतक ६ जनाको परिवारलाई राहत उपलब्ध गराउने महानगरले विज्ञप्तिमार्फत जानकारी गराएको छ।
मृतकका आफन्तहरु सरकारले शव ल्याउन पहल गरिदियाेस् भनी अपेक्षा गरिरहेका छन्। आफूहरुले कोसिस गर्दा लामो प्रकृया लाग्ने भएकोले सरकारले नै पहल गरिदियाेस् भन्छन् शिवनारायण चौधरी।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764947412.jpg)
-1764146706.png)
