काठमाडौं- काठमाडौं पोस्ट राष्ट्रिय दैनिकमा प्रकाशित एक आलेखमा माओत्से तुङको फोटो गलत अर्थ दिने गरी प्रकाशित भएको भन्दै नेपालस्थित चिनियाँ दूतावासले गम्भीर असन्तुष्टि प्रकट गरेको छ।
फेब्रुअरी १८ (फागुन ६) मा प्रकाशित आलेख 'चाइनाज सेक्रेसी ह्याज मेड कोरोना भाइरस क्राइसिस मच वर्स' शीर्षकमा इभो डाल्डरले लेखेको आलेखका साथ कोरोना भाइरसबाट बच्नकै लागि माओत्से तुङले मास्क लगाएजस्तो भान हुने गरी फोटो छापिएपछि दूतावासले गम्भीर असन्तुष्टि प्रकट गरेको हो।
'यसप्रति हामी गम्भीर असन्तुष्टि प्रकट गर्दछौं,' विज्ञप्तिमा भनिएको छ, 'यसले चिनियाँ जनतालाई गहिरो चोट पुगेको छ।'
कोरोना भाइरसका कारण अन्तर्राष्ट्रिय जनस्वास्थ्य आपत्काल घोषणा भइसकेको छ।
कोरोना भाइरसबाट बच्नका लागि मास्क लगाउन चिकित्सहरूले सुझाव दिँदै आएका छन्।
चीनले कोरोना भाइरसको महामारी रोक्न कडा निगारानी गरेको र यसका सकारात्मक परिणाम समेत आएको दूतावासले जारी गरेको विज्ञप्तिमा भनिएको छ।
गम्भीर असहमति जनाएको दूतावासले काठमाडौं पोस्टका प्रधान सम्पादक अनुप काफ्ले चीनसँग सम्बन्धित विषयमा जहिल्यै पूर्वाग्रही भएको समेत आरोप लगाएको छ।
'काठमाडौं पोस्टका प्रधान सम्पादक चीनसँग सम्बन्धित विषयमा जहिल्यै पूर्वाग्रही हुनु दुखद् हो। यसपटक उनी केही चीनविरोधी समूहको सुँगा भएका छन्,' विज्ञप्तिमा भनिएको छ।
चिनियाँ दूतावासले जारी गरेको विज्ञप्तिको पूर्णपाठका लागि यहाँ क्लिक गर्नुहोस्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
