काठमाडौं- परराष्ट्रमन्त्री प्रदीपकुमार ज्ञवाली बंगलादेशको तीन दिने औपचारिक भ्रमणमा लागि ढाका प्रस्थान गरेका छन्।
बंगलादेशी विदेशमन्त्री डा एके अब्दुल मोमेनको निमन्त्रणमा मन्त्री ज्ञवाली सोमबार बिहान ढाका प्रस्थान गरेका हुन्।
मन्त्री ज्ञवालीलाई परराष्ट्र मन्त्रालयका निमित्त सचिव भरतराज पौड्याल, शिष्टाचार महापाल गेहेन्द्र राजभण्डारी र यहाँस्थित बङ्गलादेशी राजदूतावासका वरिष्ठ अधिकारीले त्रिभुवन विमानस्थलमा बिदाइ गरेका थिए।
मन्त्री ज्ञवालीको टोलीमा परराष्ट्र मन्त्रालयका सचिव शंकरदास बैरागी, मन्त्रालयका सहसचिव यज्ञबहादुर हमाल, उद्योग, वाणिज्य तथा आपूर्ति मन्त्रालयका सहसचिव नवराज ढकाल र ऊर्जा, जलस्रोत तथा सिँचाइ मन्त्रालयका सहसचिव प्रवीण अर्यालसमेत छन्।
मन्त्री ज्ञवाली नेतृत्वमा ढाकामा दुई देशबीच मङ्गलबार प्रतिनिधिमण्डलस्तरीय वार्ता हुनेछ।
परराष्ट्र मन्त्रालयका अनुसार दुवै देशका परराष्ट्रमन्त्रीले आपसी सम्बन्धका साथै साझा चासोका ऊर्जा, व्यापार, पारवहन, सम्पर्क सञ्जाल, पर्यटन, क्षेत्रीय तथा बहुपक्षीय सहयोग प्रवर्द्धनमा केन्द्रित रहेर विचार आदानप्रदान गर्न कार्यक्रम रहेको छ।
त्यस्तै बंगलादेश अन्तर्राष्ट्रिय रणनीतिक अध्ययन प्रतिष्ठानले आयोजना गर्ने ‘नेपाल-बङ्गलादेश सम्बन्ध र दक्षिण एसियाली सहयोग’ विषयमा उनले प्रवचन दिने छन्।
मन्त्री ज्ञवाली नेतृत्वको प्रतिनिधिमण्डल बुधबार स्वदेश फर्कनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
