राजविराज (सप्तरी)– मुस्लिम समुदायको धार्मिक सम्मेलन ‘इज्तिमा’मा सहभागी हुन सप्तरी आएका २ जनाको मृत्यु भएको छ। जिल्ला प्रहरी कार्यालय सप्तरीका अनुसार २ भारतीय नगरिकको मृत्यु भएको हो।
भारतको विहारस्थित पश्चिम चम्पारन, वसन्तपुरका ६२ वर्षीय नेक मोहम्मद र मोतिहारीका ७४ वर्षीय हारुन रसिदको मृत्यु भएको जिल्ला प्रहरी कार्यालय सप्तरीका डिएसपी तिलक भारतीले बताए। हृदयाघातका कारण उनीहरुको मृत्यु भएको प्रहरीले जनाएको छ।
सहभागीहरुले अन्य एक नेपालीको पनि मृत्यु भएको जानकारी दिएका छन्। तर, प्रहरीले त्यसको पुष्टि गरेको छैन। ‘घर पुगिसकेको कोही एक जनाको विषयमा हल्ला आएको हो, तर अधिकारिक रुपमा पुष्टि भएको छैन,’ डिएसपी भारतीले भने।
बोदेबरसाइन नगरपालिका-५, जाँजरमा आयोजित तीन दिने ‘इज्तिमा’ सोमबार समापन हुँदैछ। कार्यक्रममा करिब ५ लाख मुस्लिम धर्मावलम्बी सहभागी भएको बताइएको छ। भारतको नयाँ दिल्लीका मौलाना साद साहाब र नेपाली जमातका अध्यक्ष मो. निसारुद्दिनलगायतका धर्मगुरुले कार्यक्रममा प्रवचन दिइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
