बुर्किन- बुर्किन फासोको उत्तरी क्षेत्रमा भएको नरसंहारका क्रममा ३९ जना मारिएका छन्।
जिहादीहरुले एउटा गाँउमा गरेको आक्रमणमा परी उनीहरु मारिएको सरकारी अधिकारीहरुले बुधबार जानकारी दिएका हुन्।
घटनास्थलबाट अनौपचारिक रुपमा प्राप्त जानकारीअनुसार घटनामा परी ५० भन्दा बढीको मृत्यु भएको छ।
‘सरकारी सुरक्षाकर्मीहरुले त्यस क्षेत्रमा कारवाही अभियान चलाएका छन्, उनीहरुले नै ३९ जनाको मृत्यु भएको पुष्टि गरेका छन्, विद्रोहीले अत्यन्त दर्दनाक आक्रमण गरेका थिए,’ सरकारका प्रवक्ता रेमिस फुल्गान्स डान्डजीनौद्वारा जारी वक्तव्यमा उल्लेख गरिएको छ।
देशको उत्तरी सौम प्रान्तमा गत शनिबार घटना भएको बताइएको छ। घटनास्थल छिमेकी मुलुक मालीसँगको सीमा क्षेत्रमा पर्दछ। आक्रमणकारीहरुले गाउँका पुरुषहरुलाई छोपीछोपी हत्या गरेको र महिलाहरुलाई गाउँ छाड्न आदेश दिएको स्थानीयबासीले बताएका छन्। उनीहरुले ५० भन्दा बढी मारिएको बताएका छन्।
घटना हुने बित्तिकै सुरक्षाकर्मीहरु गाउँमा पस्न पनि सकेका थिएनन्। आक्रमणकारीहरुको अवरोधका कारण उनीहरु पुग्न नसकेको बताइएको छ।
जिहादीहरुका कारण बुर्किन फासोमा अहिलेसम्म ८ सयभन्दा बढी नागरिकको हत्या भएको छ भने ६ लाखभन्दा बढी विस्थापित भएका छन्। फुर्किन फासोमा सन् २०१५ देखि जिहादीहरुले हिंसा सुरु गरेका थिए। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
