विराटनगर- सस्तोमा आइफोन र स्यामसुङ्ग मोबाइल मिलाइदिने भन्दै ग्राहक ठगी गर्ने गिरोह पक्राउ परेको छ। फेसबुकमा नक्कली ‘अनलाईन सपिङ पेज’ बनाई ग्राहक ठगी गर्ने ८ जनालाई मोरङ प्रहरीले पक्राउ गरेको हो।
फेसबुकमा ‘बेष्ट बाई एप्पल स्टोर, बेष्ट इलेक्ट्रोनिक्स स्टोर फोन र के मार्ट इलेक्ट्रोनिक्स नाम गरेर खोलिएको पेजबाट सस्तोमा आईफोन र सामसुङ ब्राण्डका मोबाइल बिक्री गर्ने भनेर ग्राहकसँग ६७ लाख रुपैयाँ ठगी गरिसकेको गिरोहलाई जिल्ला प्रहरी कार्यालय मोरङले पक्राउ गरी मंगलबार सार्वजनिक गरेको हो।
पक्राउ पर्नेहरुमा मोरङ सुन्दरहरैचा-३ बस्ने ३६ बर्षीय निरञ्जनप्रसाद आचार्य, खोटाङ-४ बस्ने शिवजी खड्का, खोटाङकै देवी चौलागाई, सुनसरी धरान-२० का भावना राई, धरानकै सरिता परियार, वर्षा कार्की, सानु गौतम र लक्ष्मी कार्की छन्।
पक्राउ परेकामध्ये निरञ्जन प्रसाद आचार्य ठगीको प्रमुख योजनाकार भएको प्रहरीले जनाएको छ।
उनै आचार्यले वर्षा कार्की, लक्ष्मी कार्की, सानु गौतम लगायतका मानिसहरूलाई एनआईसी एशिया बैंकको खाता खोल्दा २ हजार र अन्य बैंकको खाता खोल्दा १ हजार दिने सर्तमा खाता खोली सोही खाता मार्फत पनि ठगी गर्ने गरेका थिए।
जिल्ला प्रहरी प्रमुख विश्व अधिकारीका अनुसार उनीहरुको साथबाट ६७ लाख ९९ हजार ७ सय ५० रुपैयाँ बरामद गरिएको छ।
यस्तै ३७ वटा एटिएम, ५८ वटा चेक बुक, निरञ्जन प्रसाद आचार्यको भारतीय आधार कार्ड, लाईसेन्सलगायत सिमकार्डहरु बरामद गरिएको अधिकारीले बताए।
उनीहरुले फेसबुक पेजमा महंगो मूल्यका मोबाइल सेट तथा अन्य इलेक्ट्रोनिक्स सामानहरुको फोटो पोष्ट गर्ने गर्थे। फोटो मन पराउनेहरुले गरेका कमेन्ट र म्यासेजहरुमा यो समूहले गलत व्यक्तिको कागजात प्रयोग गरेर विभिन्न बैंकका खाताहरुमा पैसा हाल्न लगाई ठगी गर्ने गरेको प्रहरीले बताएको छ।
यो समूहले विगत ६ महिनादेखि ठगी गर्ने नियत राखी फेसबुकमा पेज खोलेको थिए। सामान मन पराउनेहरुसँग दोहोरो कुरा नगरी ‘ह्वाट्स एप’ मार्फत मात्र पैसाको डिल हुने गरेको अधिकारीको भनाइ छ।
उक्त सामान प्राप्त गर्न प्रतिमा पराजुली, गरिमा खड्का, छत्रकुमारी धमलालगायतका मानिसहरूको नामको नक्कली कागजातहरू सहित खोलिएको बैंक खातामा रकम जम्मा गर्न लगाई ग्राहकलाई सामाग्री नदिई सम्पर्क विहीन हुने गरेको बताइएको छ।
खातामा जम्मा भएको पैसा निकाल्ने काममा शिवजी खड्का, देवी चम्लागाई, सरिता परियार खट्ने गरेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।