धरान- लामो समयदेखि भूमाफियाको चंगुलमा फस्दै आएको सुनसरीको धरानस्थित सर्दु जलाधारको जग्गा सरकारी स्वमित्वमा आउने प्रकृया सुरु भएको छ।
सट्टा भर्ना पाएर पनि लगतकट्टा नहुँदा भूमाफियाले किनबेच गरिरहेको सर्दु जलाधार क्षेत्रको जग्गा अब नेपाल सरकारको नाममा जाने भएको हो। सोमबार बसेको मन्त्रिपरिषद् बैठकले सर्दु जलाधारको जग्गा सरकारी स्वामित्वमा ल्याउने निर्णय गरेको छ।
सरकारले गठन गरेको सार्वजनिक तथा गुठी जग्गा जाँचबुझ आयोगको प्रतिवेदन कार्यान्वयन गर्ने निर्णय बैठकले गरेको हाे। यो निर्णयसँगै आयोगले जाँचबुझ गरेको सर्दु जलाधार क्षेत्रसँगै अन्य स्थानको पनि जग्गा नेपाल सरकारको नाममा जाने भएको हो।
२०३३ मा तत्कालीन राजा वीरेन्द्र शाहले धरानको खानेपानीको स्रोत रहेको जलाधार क्षेत्रका बासिन्दालाई मोरङको वयरवन क्षेत्रमा सट्टा भर्ना दिन निर्देशन दिएका थिए। सोही बमोजिम सर्दु जलाधार क्षेत्रको बस्तीलाई स्थानान्तरण गरीएको थियो। तर, लगतकट्टा नगर्दा दुवैतिर फाइदा लिएको र अहिले भूमाफियाहरुले अतिक्रमण र किनबेच गरिरहेको भनी आयोगले सरकारसमक्ष प्रतिवेदन बुझाएको थियो।
यसका साथै आयोगले सर्वोच्च अदालतमा सट्टाभर्ना पाएको प्रमाण पेश नगरी रोक्का फुकुवा गराएको छोटी मोरङ डाँडासहित ४२ बिघा जग्गा तत्काल लगतकट्टा गरी सरकारको नाममा ल्याउन सुझाव दिएको थियो। आयोगका अनुसार ३ सय ४८ बिगाह जग्गा अझै व्यक्तिकै नाममा छ। आयोगले धरानको सर्दुजलाधार क्षेत्रसँगै अन्य ८ जिल्लाको गुठी र सरकारी जग्गा अतिक्रमणबारे छानबिन गरेर प्रतिवेदन प्रधानमन्त्री केपी शर्मा ओलीलाई बुझाइसकेको छ।
यसअघि भूमाफियाले कर्मचारी, स्थानीय नेता, मन्त्रीदेखि एनजीओकर्मी सम्मलाई प्रभावमा पारेर जग्गा हडपी रहेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
