इटहरी- माघ १२ गते आइतबार बिहान संखुवासभाको चिचिला गाउँपालिका–२ पुखुवामा रहेको अरुण तेस्रो जलविद्युत आयोजनाको पावर हाउस नजिकै बम विष्फोट भयो।
कुकर बम बिष्फोट हुँदा अरुण तेस्रो आयोजनामा प्रयोग भएको जेनेरेटर र पर्खालमा क्षति पुगेको छ।
तर बम कसले विष्फोट गराएको भन्नेबारे अझै यकिन हुन सकेको छैन। यसअघि पनि पटक–पटक नेत्रविक्रम चन्द विप्लव नेतृत्वको नेकपाका कार्यकर्ताले यस आयोजनामा बम विष्फोट गराउँदै आएकाले यसपल्ट पनि विप्लव कार्यकर्ताले विष्फोट गराएको हुनसक्ने प्रहरीको अनुमान छ। सोही दिन राती ९ बजे मोरङको केराबारीमा रहेको एनसेल टावरमा पनि विष्फोट भयो।
पछिल्लो समय पूर्वी नेपालमा श्रृङ्खलाबद्ध बम बिस्फोटका घटना हुँदै आएका छन्। गत शुक्रबार मोरङको केराबारी गाउँपालिकामा कार्यलय अगाडि बम विस्फोट भयो।
बम पड्किएको स्थान नजिकै अर्को सुतली बम फेला पर्यो। रातको १० बजेतिर भएको घटनाको अहिलेसम्म कसैले जिम्मा लिएको छैन।
यही माघ ५ गते आइतबारमात्रै मोरङको मिक्लाजुङ गाउँपालिका-१ रमितेमा स्काभेटरमा आगजनी भयो। निमार्णाधीन ‘उर्लाबारी – किशान चोक – रमिते’ सडक निर्माणका लागि राखिएका ३ वटा स्काभेटरमा आगजनी भएको थियो।
सुरक्षा अधिकारीले भने स्काभेटरमा पेट्रोल बम प्रहार गरी आगजनी गरिएको निष्कर्ष निकालेका छन्। प्रदेश १ सरकारको ५८ करोड ५६ लाखको बजेटबाट ठेक्का स्वीकृत भई सडक निमार्णको काम भइरहेको छ।
सोही दिन झापाको दमक १० स्थित रतुवा खोलामा पूल निर्माणको लागि राखिएको स्काभेटरमा पनि आगजनी भएको थियो।
उता यही माघ ३ गते धनकुटाको कृषि अनुसन्धान केन्द्रमा अन्तरजिल्ला सुरक्षा समन्वय बैठक सम्पन्न भएको थियो। धनकुटा, मोरङ, सुनसरी, तेह्रथुम, भोजपुर र संखुवासभा जिल्लाका सुरक्षा अधिकारी सम्मिलित बैठकले विप्लव समूहको गतिविधि नियन्त्रणमा आउन थालेको निष्कर्ष निकालेको थियो।
बैठकले गरेको निर्णयको ५ नम्बर बुँदामा विप्लव समूहका नेता तथा कार्यकर्ता धमाधम पक्राउ गरिनुले यस समूहका गतिविधि नियन्त्रणमा ‘सकरात्मक परिणाम’ देखिएको उल्लेख छ।
साथै अगामी दिनहरुमा यस्ता गतिविधि नियन्त्रणमा ल्याउन प्राप्त सूचना जिल्ला स्तरका सुरक्षा निकायबीच आदानप्रदान गर्ने पनि निर्णयमा लेखिएको छ।
बैठकमा ६ जिल्लाका प्रजिअ, जनपथ प्रहरी र सशस्त्र प्रहरीका एसपी, नेपाली सेना र राष्ट्रिय अनुसन्धान विभागका उप–अनुसन्धान निर्देशकहरु सहभागी थिए।
पछिल्लो समय बढ्दै गएका बम विस्फोटका घटनामा विप्लब समूहको संलग्नता रहेको प्रदेश १ प्रहरी कार्यालय विराटनगरका डिआइजी ठाकुरप्रसाद ज्ञवाली बताउँछन्।
विप्लबले घोषित रुपमै चन्दा आतंक फैलाउँदै आएको र बम विस्फोट गराएको उनको भनाइ छ।
यो उनीहरुको चन्दा माग्ने रणनीति अन्तर्गत नै भएको हुन सक्ने उनले बताए। यस बीचमा प्रदेश १ का ११ जिल्लाका इन्चार्ज पक्राउ परिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
